30 iyul tarixində Marneulidə Məhəmməd Əmin Rəsulzadə adına
təşkilat fəaliyyətə başladı. Təşkilatın əsas məqsədi Rəsulzadənin
adının yaşadılması və onun tanıdılmasına xidmət etməkdir.
Təşkilatın rəhbəri və yaradıcısı İsa Qarayev "Marneuli" radiosu ilə
söhbəti zamanı bildirdi ki, son zamanlar Məhəmməd Əmin Rəsulzadənin
adı unudulur. Təşkilat rəhbəri onu da bildirdi ki, Məhəmməd Əmin
Rəsulzadə Təşkilatı (MERT) həm də xeyriyyəçilik işləri ilə məşğul
olacaq.
İsa Qarayev onu da bildirdi ki, təşkilatın əsas ofisi Marneulidə
fəaliyyət göstərəcək və digər bölgələrdə də ofislərinin açılışını
planlaşdırırılar. Həmçinin Məhəmməd Əmin Rəsulzadə adına fond da
fəaliyyət göstərir.
Xatırladaq ki, Azərbaycanlı dövlət və ictimai xadim, siyasətçi və
publisist, Azərbaycan Xalq Cümhuriyyətinin banilərindən Məhəmməd
Əmin Rəsulzadə 1884-cü il yanvarın 31-də Bakının Novxanı kəndində
anadan olmuşdur. Din xadimi olan atası oğlunu məşhur pedaqoq Sultan
Məcid Qənizadənin müdir olduğu ikinci “Rus-müsəlman” məktəbinə
qoymuş, buranı bitirdikdən sonra M.Ə.Rəsulzadə öz təhsilini Bakı
texniki məktəbində, rus dilində davam etdirmişdir.
Azərbaycan milli istiqlal hərəkatının və təkcə türk ellərində
deyil, bütün islam aləmində ilk respublika üsul-idarəsi olan
Azərbaycan Demokratik Respublikasının təməl daşını qoyan Məhəmməd
Əmin Rəsulzadənin inqilabi fəaliyyətinin ilk illəri də məhz bu
dövrə təsadüf edir. 1902-ci ildə on yeddi yaşında olan
M.Ə.Rəsulzadə “Müsəlman gənclik təşkilatı”nı yaratmışdır. Bu, XX
əsrdə Azərbaycanda rus müstəmləkə üsul-idarəsinə qarşı gizli
mübarizə aparan ilk siyasi təşkilat idi.
Azərbaycan tarixinin ən görkəmli və böyük şəxsiyyətlərindən olub,
Azərbaycan milli istiqlal hərəkatına başçılıq etmişdir. Onun “Bir
kərə yüksələn bayraq, bir daha enməz!” ifadəsi XX əsrdə
Azərbaycanda müstəqillik hərəkatının şüarı olmuşdur.