Həmrəylik muzeyi Marneulidə, 9 aprel küçəsində yeni ofis açır.
Ofisin bir neçə funksiyası olacaq.
Həmrəylik muzeyinin rəhbəri Elnur Əlisoy “Marneuli” radiosu ilə
söhbəti zamanı bildirdi ki, yeni ofisin əsas funksiyası muzey
komandasına iş məkanı yaratmaqdır.
“Muzeyin 18 nəfərlik komandası və əlavə olaraq
könüllülər üçün məkan olacaq. Orada toplaşacağıq və iş yerimiz
olacaq. Elə mühit yaratmışıq ki, biz araşdırmalar apara və
topaldığımız bütün məlumatlar üzərində işləyə bilək. Eləcə də,
kiçik məkanımızı gözəlləşdirməyi və gələcəkdə ofisin bir tərəfində
sərgi yaratmağı düşünürük”.
Əlisoyun sözlərinə görə, indiki mərhələdə ofisdə yenidən təmir
işləri aparılır və yaxın gələcəkdə başa çatacaq.
Həmrəylik muzeyinin məqsədi Gürcüstanda qeyri-dominant etnik və
dini qrupların təşkili və onların hüquqi vəziyyətini
yaxşılaşdırılmasıdır ki, öz kimliklərini, mədəni irsilərini qoruya,
tanıda bilsinlər.
“Biz əsasən Kvemo Kartli və Kaxetidə işləyirik. Ancaq
bu iki ərazi ilə məhdudlaşmırıq. Abidə statusu olmayan abidələri
tapır və araşdırırıq. Bununla Gürcüstan Mədəni İrsin Mühafizəsi
Milli Agentliyinə kömək edirik. Biz materiallar hazırlayırıq və
müvafiq qurumlara təhvil veririk ki, abidələr barədə məlumatları
olsun, onları tanıya, qoruya, qayğısına qala
bilsinlər”.
Həmrəylik muzeyinin rəhbərinin sözlərinə görə, indiki mərhələdə
əsas üç layihə üzərində işləyirlər. Etno-turlar keçirir, turlardan
sonra səfər iştirakçılarının onlarla bölüşdüyü təəssüratlar
əsasında isə tövsiyələr hazırlayırlar. İkinci layihənin məqsədi
Marneulidə diyarşünaslıq muzeyi açmaqdır. Təşkilat nümayəndələri
isə bu ideyanı təşviq edəcəklər.
Üçüncü layihə çərçivəsində isə təşkilat Kvemo Kartlidə abidələrin,
muzeylərin və büdcə məsələlərinin monitorinqini müzakirə/analiz
edəcək. Araşdırma nəticəsində əldə olunmuş tövsiyələri isə müvafiq
qurumlara çatdıracaq.