30 oktyabr tarixində Saqareco bələdiyyəsinin Qaraçöp icmasının
Qazlar kəndində kənd yığıncağı keçirilib.
Görüş “Qaraçöp İcma Mərkəzi” tərəfindən təşkil edilib. Yığıncağın
əsas məqsədi kənddə mövcud olan problemlərin və ehtiyacların əhali
ilə müzakirə edilməsi, daha sonra isə əhalini narahat edən
məsələlərin yerli özünüidarəetmə orqanlarının gündəliyinə salınması
idi.
“Qaraçöp İcma Mərkəzi”nin həmtəsisçisi Ayhan Həsənli “Marneuli”
radiosuna bildirdi ki, görüşdə iştirak edən kənd sakinləri
prioritet olaraq içməli su və yol problemini dilə gətiriblər.
“Kənd yığıncağının məqsədi Qaraçöp icmasının Qazlar
kəndində olan problemləri səsləndirilməsi, kənd əhalisi ilə
birlikdə problemlərin müzakirə edilməsi və mövcud problemləri
bələdiyyənin gündəminə salınması idi. Görüşdə iştirak edən şəxslər
aktiv şəkildə Qazlar kəndində olan problemləri dilə gətirdilər.
Qeyd edilməli amildir ki, demək olar, Qazlar kəndində heç bir şey
yoxdur. Belə deyim, təməl infrastruktur binaları olan uşaq bağçası,
məktəb binası, idman kompleksi, yol, su və s. yoxdur. Yollar pis
gündədir. Hətta bu yaxınlarda yağış yağanda minik maşınları yolda
qalmışdı, hərəkət edə bilmirdi. Onların hərəkətini təmin etmək üçün
əraziyə traktor cəlb olunmuşdu. Demək olar ki, kənddə insanın təməl
ehtiyaclarını qarşılayacaq heç nə yoxdur. Görüşdə xalq aktiv
şəkildə bu problemləri səsləndirdilər. Kənd əhalisi əsas iki
problemi prioritet olaraq səsləndirdilər. Onlar yol və içməli su
problemləri idi. Ancaq digər problemləri də dilə gətirirdilər. İlk
növbədə əhali deyirdi ki, yol və su problemi aradan
qaldırılmalıdır”.
Həsənlinin sözlərinə görə, görüşdə ərizə yazılaraq imza toplanıldı.
Yaxın günlərdə meriyaya təqdim edəcəklər. Onlar bununla birlikdə
Saqareco meriyasına Qazlar kəndində yol probleminin aradan
qaldırılması istiqamətində büdcə təşəbbüsünü də daxil
edəcəklər.
Görüşdə “Salam” platforması, “Sosial Ədalət Mərkəzi”nin
nümayəndələri iştirak edirdilər. Həsənlinin dediyinə görə, görüşə
Saqareco meriyasının nümayəndələri də dəvət olunmuşdu.
“Baxmayaraq ki, Saqareco meriyası və Bələdiyyə Məclisin
sədri və üzvləri də dəvət olunmuşdu, onlar yığıncaqda iştirak
etmirdilər. Onlara yığıncaq haqqında, 14 oktyabr tarixində rəsmi
olaraq məlumat verilmişdi və dəvət olunmuşdular. Sadəcə Bələdiyyə
Məclisinin müxalifət partiyasından olan bir nəfər üzvü görüşdə
iştirak etdi. O, xalqın problemləri ilə yaxından maraqlandı və qeyd
etdi ki, Bələdiyyə Məclisinin iclası keçiriləndə bu problemləri
gündəmə gətirəcək”.
Təşkilatçıların sözlərinə görə, kənd yığıncağı Qaraçöp icması
tarixində ilk dəfə keçirilib.