Baş nazir Qiorqi Qaxaria bildirib ki, onun fikrincə təhsil
müəssisələrində dərs prosesinin bərpası 26 aprel tarixinə qədər tam
mümkün olmayacaq.
Bu haqda Qaxaria “Rustavi 2”-nin efirində danışıb.
“Təhsil prosesi artıq iki həftədən çoxdur ki, təxirə
salınıb. Prioritetləri necə qaydaya salacağımızla bağlı razılığa
gəlməliyik. Əlbəttə, hakimiyyət üçün ilk prioritet bizim
vətəndaşların, ilk növbədə uşaqların sağlamlığıdır. Burada müəyyən
müddətlər var. Bu problemə Təhsil Nazirliyinin söhbət apardığı vaxt
ərzində cavab verə biləcəyikmi, buna şübhəm var. Məsələn, bu günə
olan məlumatlara görə, Təhsil Nazirliyi deyir ki, əgər 26 aprelə
qədər məktəblərdə proses bərpa olunmazsa artıq bütün ilin təhsil
prosesi sual altına düşür. Orada müəyyən standartlar var. Təhsil
Nazirliyinə tapşırıq verilib ki, yaxın günlərdə plan təqdim etsin.
Mənim şübhəm var ki, 26 aprelə qədər biz təhsil prosesini tam bərpa
edə bilək, ancaq buna ümid edirik”, - Qaxaria
bildirib.
Onun sözlərinə görə, bu planda təxirə salınan təhsil prosesinin
necə bərpa olunacağı yazılmalıdır. O, həmçinin, onlayn dərslərlə
bağlı da şərh verib.
“Bizim sistemin tam distant rejimə keçməyə hazır
olmaması faktdır və özümüzü aldatmayaq. Ola bilsin bəzi məktəblər
daha çox hazırdır, amma unutmamalıyıq ki, ən çox uşaqlarımız
regionlardadır və oralarda elementar olaraq internet əlçatan deyil.
Ona görə də adekvat olaraq harada olduğumuzu
qiymətləndirməliyik”, - Qaxaria bildirib və qeyd edib
ki, ümumiyyətlə distant təhsil başqa sahədir və bunun üçün xüsusi
hazırlıq lazımdır.
17 mart tarixinə görə, Gürcüstanda 34 nəfərdə koronavirus
təsdiqlənib, 1000-dən artıq şəxs isə karantində qalmaqdadır.