Bu gün, 5 may tarixində Marneuli meri Zaur Darğallı və majoritar
deputat Tamaz Naveriani Aşağı Saral sakinləri ilə görüşüblər.
Kəndin mərkəzinə toplaşan sakinlər yığılıb qalmış kələm
məhsullarının satılmasını tələb edirlər. Sakinlər bildirirlər ki,
əkdikləri kələm satılmadıqca xarab olur. Kənd sakinləri
sahibkarların məhsulu daha çox almalarını istəyirlər, lakin,
sahibkarlar onların tələblərini qane edəcək qədər məhsul
almadıqlarına görə məhsul onların evində qalıb.
“Bu gün dövlətimiz 200 000 pul ayırsın. Bu gün, kələmə, sabah
pomidora pul ayırsınlar. Əgər bu gün dövlət məhsula pul ayırmayıb,
torpağın üstündən gəlib götürəcəksə, mən bu dövləti neyləyirəm.
Kələmin toxumunu Marneulidən almışam, Kredo bankla”,
– kənd sakini deyib.
Darğallı bildirib ki, kənddən daha əvvəl kələm toplayan “Jibe”
şirkəti hələ ki, aldığı məhsulu paylaya bilməyib. Mer “Jibe”
şirkətinin məhsulu payladıqdan sonra yenidən kəndə gələrək məhsul
alacağını bildirib. O, bildirib ki, Acarıstanın Kənd Təsərrüfat
Nazirliyindən ona zəng edib kələmə tələbat olduğunu bildiriblər.
Darğallı nazirliyə 40-50 tetridən kələm olduğunu bildirib.
“Siz bizə dediniz biz başa düşdük gözləməliyik. Bu gözləmir axı,
biz gedib baxçamızı açıb kələmə deyə bilmirik axı gözlə. Bu Zaur
müəllimin gəlməyini gözləmir, xarab olur”
Mer bildirib ki, gün ərzində kəndlərdə məhsulun satılması üçün
çalışırlar. O, deyib ki, çiyələk və kartof, eləcə də Şulaveridə
pomidor məhsulu yetişir ki, onun da satılması üçün əllərindən
gələni edəcəklər.
“Aşağı Saraldan bu günə kimi 100 tona yaxın kələm
məhsulu çıxarılıb. Sadəcə olaraq kənddə məhsul çoxdur. Başqa
kəndlərdə də bu vəziyyətdir. Sadəcə burada bəzi insanlar var ki,
məhsulu xarab olur. Qarşıdan pomidor və çiyələk məhsulu da yetişir,
biz çalışacağıq ki, məhsulun satışı həyata keçirilsin. Bilirsiniz
ki, bazarlar bağlı idi, hər gün bazarlar açılır. Biz Kənd
Təsərrüfatı Nazirliyi ilə də əlaqə saxlayacağıq, bu gün mənə
Acarıstan Kənd Təsərrüfat Nazirliyindən də zəng gəlmişdi ki, kələmə
tələbat var. Daxili bazarlarda tələbat azdır, bazarlar açıldıqca
məhsulun satışı da həyata keçiriləcək, tələbat çox olacaq. Maksimum
dərəcədə sakinlərə kömək etməyə çalışacağıq”, – Mer
Zaur Darğallı dedi.
Marneuli meri Zaur Darğallı sakinlərə vəd verib ki, bu gün kənd
məhsulları ilə bağlı meriyada iclas keçiriləcək. O, kəndlərdən gün
ərzində ən az 25-30 tona yaxın məhsul çıxara biləcəklərini
deyib.