Koronavirusa yoluxanların 33% Kvemo Kartlidəndir
Amiran Qamkrelidzenin sözlərinə görə, Kvemo Kartlidə koronavirusa
yoluxma göstəricisi Gürcüstanda virusa yoluxanların 33%-dir.
Gürcüstan miqyasında koronavirusa yoluxanların sayı 604 nəfərdir.
Ondan 198-i Kvemo Kartlidə qeydə alınıb. Kvemo Kartlidə ən böyük
yoluxma halı 117 nəfər ilə Bolnisidə, daha sonra 48 hal ilə
Tetritskarodadır, Marneulidə isə 33 yoluxma halı qeydə alınıb.
"Bildiyiniz kimi bu region sərt karantin altındadır.
Regiona növbəti dəstək proqramı hazırlanıb. Regionda virusa yoluxma
halı erkən mərhələdə aşkarlanarsa, intensiv çalışmalara
başlanılacaq", – Amiran Qamkrelidze mətbuat
konfransında bildirib.
Amiran Qamkrelidze 2 may tarixində Marneuli meriyasında olarkən
bildirib ki, Marneulidə "Geo Hospitals”ın yaxud "Aversi”nin
bazasında PCR testlər üçün kiçik laboratoriya yaradıla bilər. Bu
prosesin nə zaman həyata keçiriləcəyi haqda Xəstəliklərə Nəzarət
Milli Mərkəzindən "Marneuli" radiosuna məlumat vermədilər.
Qamkrelidze onu da qeyd edib ki, Marneulidən iki nəfər Tbilisidə
analizlərin götürülməsi ilə bağlı təlim keçəcək. Marneulinin
İctimai Səhiyyə Mərkəzində nümayəndələrinin təlimlərə nə zaman
göndəriləcəyini dəqiq bilmirlər.