Bu gün, 16 dekabr tarixində Marneuli-Qırmızı Körpü xəttində
hərəkət edən avtobus fəaliyyətini bərpa edib.
Qeyd olunan xətdə iki həftədən artıqdır ki, yalnız bir avtobus
hərəkət edirdi və buna görə əhali üçün problemlər yaranırdı.
Qırmızı Körpünün yaxınlığında yerləşən Kirəç-Muğanlı kənd sakinləri
12 dekabr tarixində “Marneuli” radiosu ilə söhbətləri zamanı
bildirmişdilər ki, Qırmızı Körpüdən Marneuliyə gələn avtobus yalnız
saat 10:00-da çıxırmış, saat 15:30-da isə geri qayıdırmış. Marneuli
“Avtopark”-ın rəhbəri Qiqa Calağonia o zaman bildirmişdi ki,
avtobusun qrafiki dəyişməyib, problem isə avtobuslardan birinin
xarab olmasına görə yaranıb.
Bu gün, 16 dekabr tarixində Qiqa Calağonia “Marneuli” radiosuna
bildirdi ki, avtobusla bağlı yaranmış problem həll olunub.
“Güman ki, növbəti dəfə xarab olana qədər adi rejimdə
hərəkətinə davam edəcək”, – Qiqa Calağonia
bildirdi.
Calağonianın sözlərinə görə, Marneuli-Qırmızı Körpü xəttində cəmi
iki bələdiyyə avtobusu hərəkət edəcək. Səhər saat 08:00-da bir
avtobus Qırmızı Körpüdən Marneuliyə, digər avtobus isə Marneulidən
Qırmızı Körpüyə çıxacaq. Avtobuslar saat 17:00-da sonuncu reysi
həyata keçirəcəklər.