Bu gün, 11 yanvar tarixində Bidzina İvanişvili “Gürcü Arzusu”-ndan
getməsi barədə bəyanat verib.
“Mən partiya sədri vəzifəsini, eləcə də partiyanı tərk
edirəm və 2011-ci ilədək olduğu kimi, şəxsi həyat tərzimə
qayıdıram”, – Bidzina İvanişvilinin yayımladığı
bəyanatda deyilir. Bəyanatı “Gürcü Arzusu” yayımlayıb.
Doqquzuncu çağırış Parlamentin üzvü Tamaz Naveriani “Marneulİ”
radiosu ilə söhbəti zamanı İvanişvilinin “Gürcü Arzusu”-ndan
getməsini dəyərləndi.
“O, bunu daha yaxşı bilir və ona görə də belə qərar
qəbul edib. Mən onun əvəzinə nə deməliyəm”, – Tamaz
Naveriani bildirdi.
Naverianinin sözlərinə görə, partiya sədrinin getməsi güman ki,
“Gürcü Arzusu”-nda müvafiq dəyişikliklərə səbəb olacaq.
“Əlbəttə adam bu böyüklükdə partiya rəhbərliyini tərk
edirsə, partiyada hər hansı dəyişikliklər
gözlənilir”, – Tamaz Naveriani bildirdi.
Naveriani 2016-20-ci illərdə Parlamentin Marneuli seçki dairəsindən
majoritar deputatı idi. Onuncu çağırış Parlamentin ilk
toplantısından sonra onun səlahiyyətləri dayandırıldı. Naverianinin
sözlərinə görə, indiki mərhələdə Cüdo Federasiyasının prezidentidir
və idman istiqamətində çalışmağa fəal davam edir. Ancaq siyasi
gələcəyinin necə olacağı barədə qərar verməyib.