Bölgələrdən gətirilən kənd təsərrüfatı məhsulları Tbilisidə üç yerə
satılacaq. Ekologiya və Kənd Təsərrüfatı Nazirliyinin Kənd
Təsərrüfatı Məhsulları və Kəndlərin İnkişafı Departamentinin
rəhbəri Tenqiz Kalandadzenin
“Business Press News”-a verdiyi məlumata görə, topdan satış
nöqtələri Qldani, Didube və Orxevidə olacaq.
Onun sözlərinə görə, bölgələrdən məhsulu bütün tələblərə uyğun
infrastrukturu olan "Jibe" şirkəti gətirəcək.
Məlumat üçün qeyd edək ki, ekologiya və kənd təsərrüfatı naziri
Levan Davitaşvilinin bir neçə gün əvvəl bildirdiyinə görə,
fermerlərə tez xarab olan məhsullarını topdansatış imkanı
yaradılacaq. Onun sözlərinə görə, "Jibe" MMC-nin bazasında xüsusi
platforma yaradılıb.
"Tbilisidə – Qldani, Tsereteli prospekti və Orxevidə
kənd təsərrüfatı məhsullarının yerləşdiriləcəyi üç topdansatış
məntəqəsi açılacaqdır. “Jibe” MMC bütün tələblərə tam cavab verən
infrastruktura malikdir. Şirkət nümayəndələri bölgələrə öz
avtomobilləri ilə gedəcək və məhsulu yerində birbaşa fermerlərdən
alacaqlar. Ödəniş də yerindəcə olacaq", – Tenqiz
Kalandadze deyib.
Onun sözlərinə görə, fermerlərlə “Jibe” MMC arasında vasitəçiliyi
nazirlik və regional qərargahlar yerinə yetirəcək ki, fermerlərin
səfərbərliyi və məhsulun alınması bütün tövsiyələrə riayət olunaraq
baş tutsun.
"Biz fermerlər və “Jibe” MMC arasında vasitəçi
olacağıq. Xüsusilə, nazirlik və quberniyada mövcud olan regional
qərargahın təşkilatçılığı ilə bələdiyyə səviyyəsində fermerlərə
məhsulun harada, nə vaxt və necə təhvil veriləcəyi barədə məlumat
veriləcəkdir. Bu ona görə edilir ki, şirkət qapı-qapı gəzməsin və
fermerlərin səfərbərliyi mütəşəkkil bir şəkildə baş tutsun.
Söhbət hələlik üç bölgədən – Marneuli, Kaxeti və
Mtsxeta-Mtianetidən gedir. Sonra məhsulların alınması və
gətirilməsi bütün Gürcüstan miqyasında olacaq", –
Tenqiz Kalandadze.