Xəstəliklərə Nəzarət Milli Mərkəzinin rəhbəri Amiran Qamkrelidzenin
sözlərinə görə, ənənəvi olaraq sinif otağında və auditoriyada 20
nəfər var idisə, indi belə ola bilməz və müvafiq standartlar
hazırlanmaqdadır.
Koordinasiya Şurasının iclasından sonra onun jurnalistlərə
bildirdiyinə görə, ölkədəki epidemioloji vəziyyətin pisləşməməsi
üçün bütün qaydalar düzgün planlaşdırılmalıdır.
“Epidemioloji vəziyyətlə əlaqədar olaraq indi məktəbə başlamaq
təhlükəsi yoxdur. Bu gün bizdə olan epidemioloji vəziyyət
məktəblərin açılması üçün problem yaratmır. Təhsilə başlanması
məktəblərdə də hərəkətliliyi artıracaq. Minlərlə uşaq və tələbə
təhsil almağa başlayanda, əgər əvvəllər 20 nəfər bir otaqda
otururdusa, indi ənənəvi şəkildə otura bilməyəcəklər. Bunun
üzərində çalışırıq və uşaqların sinif otaqlarında, tələbələrin
auditoriyalarda necə oturacağı ilə bağlı uyğun bir standart
hazırlayacağıq. Əllərin məhlulla tez-tez təmizlənməsi, dəhlizlərdə
fasilələr zamanı maskalardan istifadə edilməsi və bununla yanaşı
nəzərə almaq lazımdır ki, azyaşlılarda maskalardan istifadə etmək
tövsiyə olunmur, bu haqda da məsləhətlərimiz olacaq. Bu standartlar
həm məktəblər, həm də ali məktəblər üçün hazırlanır. Əminəm ki,
burada da hər şey müvafiq epidemiya əleyhinə tədbirlərə uyğun
olacaq, həm məktəblərdə, həm də universitetlərdə birlikdə ölkədə
epidemioloji vəziyyətin pisləşməsinin qarşısını ala biləcəyik.
Ancaq əlbəttə ki, belə böyük hərəkətlilikdə yoluxmanın artması
riski var. Buna görə də, epidemioloji vəziyyətinin pisləşməməsi
üçün hər şey düzgün planlaşdırılmalıdır", – deyə
Qamkrelidze bildirib.