Gürcüstanın Müstəqillik Gününün qeyd olunduğu Rustaveli prospektində polis bir nəfəri saxlayıb. Bu, Gürcüstanın Avropaya inteqrasiyasını dəstəkləyən yürüş iştirakçılarının əsas prospektdən Azadlıq meydanına keçməyə cəhd etdiyi vaxt baş verib.

Daxili İşlər Nazirliyindən “Netgazet”ə verilən məlumata görə, vətəndaş İnzibati Xətalar Məcəlləsinin 173-cü maddəsi ilə polis əməkdaşının qanuni tələbinə tabe olmamaqla saxlanılıb.

Patrul polisinin rəisi Vaja Siradzenin jurnalistlərə verdiyi məlumata görə, asayiş keşikçiləri yürüşdə iştirak edən vətəndaşlara Azadlıq Meydanında Müstəqillik Gününə həsr olunmuş təntənəli tədbirin keçirildiyini və onların “Parlamentin önündə aksiya keçirə biləcəklərini izah ediblər”.

Siradzenin sözlərinə görə, saxlanılan şəxs “oğlanlarla [polislərlə] güləşib” və “kordonu sındırıb”, buna görə də “həbsdədir”.

“Gürcüstan Avropanı seçir” adlı yürüş Azadlıq meydanında rəsmi tədbirlə paralel keçirilib. Yürüşdə iştirak edən vətəndaşlar əllərində Avropa İttifaqı və Gürcüstan bayraqları ilə Şota Rustavelinin abidəsi önünə toplaşıb, daha sonra parlamentə doğru hərəkət ediblər.

Daha sonra onların bir qismi Azadlıq meydanına keçib. Bundan əvvəl vətəndaşlar parlamentin yaxınlığında dayanan polis kordonunun Azadlıq meydanına getməsinə imkan vermədiyini bildiriblər. Onların sözlərinə görə, buna səbəb yürüş iştirakçılarının özləri ilə Avropa İttifaqının bayraqlarının olması olub ki, bunu Daxili İşlər Nazirliyi təkzib edir.
Ötən il mayın 26-dan fərqli olaraq, bir çox Gürcüstan vətəndaşı tərəfindən etirazla qarşılanan Parlament binasının dekorasiyasında artıq Avropa İttifaqının bayraqları əks olunmur. Buna cavab olaraq hökumət bildirib ki, 26 May "hər il əlavə mövzu əldə edir", bu mövzu ildən-ilə dəyişir və şəhər buna uyğun formalaşır.

“Bu il 26 Mayın mesajı “Azadlıq eşqinə”dir. Paytaxtın və bütün Gürcüstanın çölü milli rəmzlərlə bəzədilib. Hökumət deyir ki, keçən ilki mövzu "Avropaya doğru" olub.
Mayın 25-də müxalifət partiyalarının deputatları parlament sədrinə müraciət edərək, mayın 26-nı qeyd etmək üçün bəzədilmiş parlament binasının fasadına Avropa İttifaqının bayrağını geri qaytarmağa çağırıblar.