73 yaşlı Sara Bayramova 30 ildir ki, Azərbaycanda yaşayır. Əslən
Tblisidəndir. O, bu ilin martın 13-də Gürcüstana gəlib. 15 martda
geri qayıdan zaman isə pandemiyaya görə Azərbaycana getməyə icazə
verməyiblər.
İndi o köməksiz vəziyyətdə qalıb. Sara Bayramova deyir ki, onun
ailə üzvləri Bakıdadır. O, indi ailəsinin yanına qayıtmaq istəyir
və hara müraciət edəcəyini bilmir.
“Mən Gürcüstan vətəndaşıyam. Bura vətəndaşı olmağımla
yanaşı 30 ildir ki, Azərbaycanda yaşayıram. Uşaqlarım da, yoldaşım
da ora vətəndaşıdır. Mənim burada evim olduğuna görə, məni
vətəndaşlıqdan çıxarmadılar. Buranın vətəndaşlığında qaldım. Orada
daimi qeydiyyatım var. Yenə də 5 illik ora qeydiyyatındayam.
Yaşamağa ixtiyarım var. Mən kömək istəyirəm ki, geri Bakıya
qayıdım”, – Sara Bayramova dedi.
Sara Bayramovanın dediyinə görə, üç aydan artıqdır ki, Gürcüstanda
qalıb. O, indi Azərbaycana qayıtmaq üçün aidiyyəti orqanlardan
kömək istəyir.
“Balalarım orada, mən burada qalmışam. İndi mən
orda-burda qalıram. Xahiş edirəm mənə kömək edin. Mənə izah edin,
başa salın ki, hara gedim, nə edim. O qədər xüsusi avtobuslar
gedir. Burada qalan millətə kömək edirlər. Bununla bağlı heç bir
yerə müraciət etməmişəm. Bu gün dedilər ki, xüsusi avtobuslar var,
mənim kimi burda qalanları göndərirlər. Harasa müraciət edəndə
hansı sənədlər lazımdır, bilmirik, bu haqda da məlumat
istəyirik”, – Sara Bayramova dedi.
Azərbaycanın Gürcüstandakı səfirliyindən "Marneuli" radiosuna
verilən məlumata görə, hər-hansı Gürcüstan vətəndaşının
Azərbaycanla əlaqəsi varsa, yəni daimi yaşayış üçün qeydiyyatı
olarsa, o şəxslər Azərbaycana gedə bilər. Bunun üçün vətəndaşlar
Azərbaycanın Gürcüstandakı səfirliyinə xarici pasportunun və daimi
yaşayış üçün aldığı sənədinin şəkilini +995 577 31 23 21 “whatsapp”
nömrəsinə göndərməlidir. Bundan sonra vətəndaşın müraciəti qəbul
olunur və qeydiyyatdan keçən şəxs Azərbaycana gedə bilər.
Təxliyəsi planlaşdırılan vətəndaşından PCR testləri
götürülür. Analizlərin cavabı neqativ olan şəxslər Azərbaycana
xüsusi avtobuslarla yola salınır. Təxliyə olunan şəxslərin
Azərbaycanda karantində saxlanılmayacağı da bildirilir. Testin
cavabı müsbət olanlar isə Gürcüstanda xəstəxanalara
yerləşdiriləcək.