13 may tarixində Tbilisidə yerləşən Cüdo Akademiyasında veteranlar
arasında Gürcüstan çempionatı keçirilib.
Çempionatda Marneulili veteran cüdoçular da iştirak ediblər.
Marneuli İdman Məktəbinin məlumatına görə, veteranlar arasında
keçirilən yarışda Marneulili idmançılar iki qızıl, iki bürünc və
bir gümüş medalı qazanıblar.
“73 kq çəki dərəcəsində 64 yaşlı Qiqla Tsipiani və 90
kq çəki dərəcəsində 53 yaşlı Emzar Kaldani birinci yerə layiq
görülüblər. 81 kq çəki dərəcəsində 30 yaşlı Levan Davadze ikinci
yerə çıxıb. Daha iki idmançı — 73 kq çəki dərəcəsində 31 yaşlı Rza
Abbasov və 73 kq çəki dərəcəsində 31 yaşlı Şalva Jorjoliani üçüncü
yeri qazanıblar”, – məlumatda deyilir.
İdman məktəbinin məlumatında o da qeyd olunub ki, idmançılar
gələcəkdə öz güclərini beynəlxalq yarışlarda sınayacaqlar.
“Onların hər biri Marneuli İdman Məktəbinin təlim-məşq
prosesində fəal iştirak edir və gələcək nəsil üçün idmançılar
yetişdirirlər. Ümid edirik ki, Marneuli və Gürcüstanın adını
beynəlxalq arenada dəfələrlə ucaldacaqlar. Avropa və Dünya
çempionatlarında mübarizə aparacaq Gürcüstanın veteran cüdoçu
komandası qaliblərdən təşkil olunub. Marneuli İdman Məktəbi
qazandığı uğurlara görə idmançılara təşəkkür
edir!”
Çempionatın sonunda idmançılara medal, kubok və sertifikatlar
təqdim olunub.