21-25 dekabr tarixlərində Tbilisidə “Budo döyüş növləri” üzrə açıq
beynəlxalq çempionat keçirilib.
Çempionatda Marneulidə fəaliyyət göstərən dörd idman məktəbinin
idmançıları da iştirak ediblər.
Yarışda “Barlas” döyüş klubunun 10 idmançısı iştirak edib. Döyüş
klubunun rəhbəri Faiq Məmmədovun sözlərinə görə, onun rəhbərlik
etdiyi klubun 6 idmançısı qələbə qazanıb.
“Yarışa 10 idmançı ilə qatılmışdım. Onlardan 3 dünya
kubokunun qalibi oldu. Biri dünya ikincisi oldu və iki idmançım isə
dünya üçüncüsü oldular. Nəticələr belədir. Peşəkar kəmərin qalibi
74 kq çəki dərəcəsində Məhəmməd Əhmədov oldu. Bundan başqa Yılmaz
Mikayılov ( 40 kq) I yeri, İsnar Hüseynov (68 kq) I yeri, Səccad
Əhmədov (62 kq) II yeri, Raul Musayev (54 kq) III yeri, Amin
Mehdiyev (32 kq) III yeri qazandılar”.
Marneuli rayonunun Lejbəddin kəndində fəaliyyət göstərən Cəlil
Səfərov adına idman klubundan 6 idmançı yarışda iştirak edib.
Klubun baş məşqçisi Namiq Səfərovun sözlərinə görə, onun
idmançıları uğurla çıxış ediblər.
“Mənim iki idmançım - Nazim Səfərov və Əli Məcidov
qızıl, iki idmançım - Balakişi Vəliyev və Elmir Allahverdiyev isə
gümüş medal qazandılar. İki idmançım isə peşəkar yarışda iştirak
etdilər. Böyüklər arasında keçirilən yarışda Rəvan Koxayev və Elnur
Məmmədov BUDO təşkilatının kəmərinə sahib
oldular”.
6 idman növü üzrə keçirilən yarışda peşəkar döyüş də keçirilib.
Peşəkar döyüşdə iştirak edən “Marneuli MMA” klubunun müəllimi Ramil
Yolçuyev də gücünü sınayıb. O, İranlı idmançı ilə üz-üzə gəlib.
“Marneulidən peşəkar döyüşdə iştirak edən təkcə mən
idim. Mən MMA üzrə döyüşdüm. Rəqibim İranlı Əli Estek idi. Onunla
84 kq çəki dərəcəsində, iki raund döyüşdüm. Hakimlərin hesablarına
görə qalib gəldim”.
“Budo Döyüş Kuboku” uğrunda keçirilən çempionatda Marneuli İdman
Məktəbinin idmançıları da iştirak ediblər. İdman məktəbinin
müəllimi Azər Məmmədovun sözlərinə görə, onun idmançıları iki
peşəkar döyüşdə iştirak edib.
“Mənim iki idmançım iki peşəkar döyüşdə iştirak etdi.
Seygah Əsgərov 80 kq çəki dərəcəsində çempion oldu. O, K-1 üzrə
BUDO təşkilatının kəmərinə sahib oldu. Daha bir idmançım – 56 kq
çəki dərəcəsində döyüşə çıxan Firudin Tanrıverdiyev boks üzrə BUDO
təşkilatının kəmərini qazandı”.
Çempionatda Bolnisi rayonunun Aşağı Qoşakilsə kəndində fəaliyyət
göstərən “İnam kikboks klubu”nun idmançıları da iştirak ediblər.
Klubun baş məşqçisi Şahin Bəxtiyarovun sözlərinə görə, onun 8
tələbəsi yarışda iştirak edib.
“İdmançılar mənim rəhbərliyim altında qatılmışdılar.
Mənim idmançılarım k-1 üzrə döyüşdülər. Onlardan 5-i birinci, 2-si
ikinci və 1 idmançım isə üçüncü oldu”, – Şahin
Bəxtiyarov dedi.
“Dünya Budo Döyüş Növləri Federasiyası”-nın təşkilatçılığı ilə
keçirilən yarışda Gürcüstan idmançıları ilə yanaşı Azərbaycan,
Türkiyə, İran, İraq, Mərakeş və Hindistan idmançıları da iştirak
edirdilər.