Tesla Model 3 elektromobili Tesla şirkətinin ən ucuz qiymətə
satılan elektromobilidir.
Bütün endirimləri nəzərə almaqla onun standart komplektasiyada
qiyməti 30 000$ təşkil edir. Lakin şirkət 25 000$ qiymətində
satılacaq elektromobilləri istehsal etmək istəyir. Keçən ayın
əvvəlində Tesla Investor Day adlı tədbiri keçirtmiş və həmin tədbir
çərçivəsində Meksikada yeni zavodun inşasını elan etmişdi.
Meksikada inşa edilən zavodda
yeni platforma əsasında qurulmuş
elektromobillərin istehsalı reallaşdırılacaq. Zavoda ümumilikdə 5
milyard dollar investisiya yatırılacaq.
Lakin şirkətin yeni zavodunda istehsal ediləcək elektromobil
barəsində hələ heç bir məlumat yoxdur. Tesla 25 000$ qiymətində
satılacaq elektromobil hazırlamağı və hər il bu elektromobildən 4
milyon ədəd satmağı istəyir. Müqayisə üçün qeyd etmək lazımdır ki,
bu ilin yekunu ərzində şirkətin satılacaq bütün nəqliyyat
vasitələrinin ümumi sayı ən yaxşı halda 2 milyon təşkil edəcək.
Əgər şirkət il ərzində 4 milyon ədəd büdcəli elektromobil satışı
məqsədinə çatsa, böyük ehtimal ilə bu, bu onilliyin ikinci
yarısında baş verəcək. Onu da qeyd etmək lazımdır ki, Tesla 2030-cu
ilə qədər hər il 20 milyon elektromobil istehsalı potensialına
çatmağı hədəfləyib.
Mənbə: technote.az