İnsanın üzünə baxmaqla xəstəliyə diaqnoz qoyan “Sehrli güzgü”
09:16 / 12.01.2024
Kanadanın “NuraLogix” tibbi texnologiya şirkəti CES 2024 sərgisində
insanın üzünü, o cümlədən dəri altındakı qan damarlarını skan edən
və əldə edilən məlumatlar əsasında onlarla xəstəliyin əlamətlərini
müəyyən edən “Anura MagicMirror” adlı innovativ cihazı təqdim
edib.
Lent.az xəbər verir ki, “Anura MagicMirror” 21,5 düymlük ekrana,
kameralara və digər sensorlara malik masaüstü cihazdır. Cihaz ilk
növbədə qan axınının analizinə diqqət yetirərək üzü skan edir. Bu
qadcet üz nahiyəsində qan damarlarını aşkar etmək üçün unikal
transdermal optik görüntüləmə texnologiyasından istifadə edir.
Maşın öyrənmə alqoritmləri bu məlumatlardan 100-dən çox sağlamlıq
parametrini təhlil etmək üçün istifadə edir.
“Bildirilir ki, “MagicMirror” qan təzyiqi, bədən kütləsi indeksi,
ürək dərəcəsi dəyişkənliyi, ürək döyüntüsü, tənəffüs dərəcəsi və üz
dərisinin yaşı haqqında məlumat verə bilər. Cihaz həmçinin şəkərli
diabet, ürək-damar xəstəlikləri, insult, hipertoniya, qaraciyər
yağlanması və digər xəstəliklərin inkişaf riskini qiymətləndirə
bilər. O, həmçinin psixi sağlamlıq riskinin qiymətləndirilməsini
təmin edir və narahatlıq pozğunluqları və depressiya əlamətlərini
müəyyən edir.
Üzün skan edilməsi prosesi cəmi 30 saniyə çəkir, bundan sonra
istifadəçi potensial patologiyalar haqqında məlumat alır.
Cihazın buraxılış tarixi və qiyməti hələ açıqlanmayıb. Yeni cihazın
xəstəxana gözləmə otaqlarında və qocalar evlərində istifadə
ediləcəyi gözlənilir.