პარლამენტარმა ალეკო ელისაშვილმა ჟურნალისტებთან ისაუბრა მას შემდეგ, რაც უმრავლესობის ლიდერ მამუკა მდინარაძეს, რომელიც იურიდიულ საკითხთა კომიტეტის სხდომაზე რუსულ კანონზე საუბრობდა, თავში მუშტი ჩაარტყა. ელისაშვილს დარბაზი დაატოვებინეს.

„ეგ კანონი ამათ ტრ**** უნდა გავუკეთოთ, რა არგუმენტები და რის არგუმენტები? ბიძინები და მიშები მიდიან და მოდიან. მიშა რომ გრგვინავდა, კი იცით, ახლა სად არის. ესეც ასე დაამთავრებს და ნუ გადაეფარებით ბოლომდე. მე ოცნების ხალხთან რამდენი გავლანძღულვარ, ხომ იცით, ტყუილუბრალოდ. მაშინ ის გავბედე, რაც ვერავინ ვერ გაბედა ოპოზიციიდან. ყველას რომ უნდოდა და არავის ერთი ადგილი არ ჰქონდა.

ერთი კაპიკი არასდროს ცხოვრებაში არ ამიღია, მე ვარ მართალი ჩემს საქართველოსთან. სულ ვცდილობდი, რომ მეთანამშრომლა, სულ ვცდილობდი, ადამიანურად მელაპარაკა — უცხოეთში იყო, აქ იყო, რომ მეთქი, საქართველოა და სახელმწიფოა და რუსეთში მიგვათრევენ.

ხალხნო, ქოცი, ნაცი, ელისაშვილი, არ აქვს მნიშვნელობა — რუსეთში მიგვათრევენ, ულაპარაკოდ, ამას წყალი არ გაუვა! სამი საათია ბლუკუნებდნენ, უბრალოდ, შუბლის ძარღვი გაიწყვიტა მდინარაძემ — თეთრზე რომ ეუბნები თეთრს, გეუბნება მწვანეაო“, — ამბობს ელისაშვილი.

„ახლა სახლში დაჯდომის დრო არ არის, ახლა ქუჩაში გამოსვლის დროა. ესენი უნდა გავყაროთ თავის რუსის კანონთან ერთად, რადგან ესენი მიგვათრევენ რუსეთში და მორჩა. ამოვიდა ყელში და მივეცი ერთი ცხვირ-პირში რუსის აგენტ მდინარაძეს და გამიგდეს მერე“, — განაცხადა ალეკო ელისაშვილმა ჟურნალისტებთან.


„შენი რუსი…“ — ისმოდა კადრში ალეკო ელისაშვილის ხმა, რის შემდეგაც მის გარშემო სხვა დეპუტატებმა დაიწყეს ჩხუბი. ამ დროს გაითიშა პირდაპირი ეთერი იურიდიულ საკითხთა კომიტეტის სხდომიდან.

დღეს, 15 აპრილის, დილიდან პარლამენტში რუსული კანონის განხილვა მიმდინარეობს, რომლის მსგავსის მიღებამ რუსეთში გააქრო დამოუკიდებელი სამოქალაქო სექტორი და მედიები.

პარარელურად, საპროტესტო აქცია იმართება პარლამენტის შენობის გარეთ.

---

„ქართული ოცნება“ კიდე ერთხელ აპირებს რუსული კანონის მიღებას, რომელიც 2023 წლის მარტში მასობრივი პროტესტის შედეგად უკან გაიწვიეს. „ქართულმა ოცნებამ“ გასულ წელს დადო პირობა, რომ რუსულ კანონს აღარ დაუბრუნდებოდნენ, მაგრამ პირობა დაარღვია. ქართულმა ოცნებამ კანონპროექტის პირვანდელი ფორმულირებიდან მხოლოდ სიტყვა "აგენტი" ამოიღო და ის უცხოური ძალის ინტერესების გამტარებლით შეცვალა.
კანონის მიხედვით, ყველა არასამთავრობო და მედიაორგანიზაცია, რომლის შემოსავლების 20%-ზე მეტი უცხოეთიდან არის მიღებული უცხოური ძალია ინტერესების გამტარებლად ჩაითვლება. სახელმწიფო არ გამოიკვლევს თუ რას საქმიანობენ და რა მიზნებს ემსახურებიან ეს ორგანიზაციები და მათ ყველას უცხოური ძალის ინტერესის გამტარებლად შერაცხავს.
კანონი მიმართულია ევროპასა და ამერიკისაგან შემოსულ დაფინანსებებზე და არა მტრულად განწყობილი ქვეყნებიდან შემოსულ დაფინანსებებზე, როგორც ეს ცივილიზებულ ქვეყნებშია.
კანონის ინიცირების გამო შეშფოთება გამოთქვეს ევროკავშირის წევრმა და საქართველოს მეგობარი ქვეყნების ლიდერებმა, რუსეთის პრეზიდენტის პრესმდივანმა კი „ქართული ოცნების“ კანონი მოიწონა.