Azərbaycanın Gürcüstandakı səfiri Faiq Quliyev bu ölkənin müxtəlif
universitetlərində təhsil alan azərbaycanlı tələbələrlə
görüşüb.
Görüş Gürcüstan Gənclərinə Yardım və Maarifləndirmə Dərnəyinin
nəzdindəki “Tbilisi oğlanlar yataqxanası”nda baş tutub.
Görüş iştirakçıları şəhidlərimizin xatirəsini bir dəqiqəlik sükutla
yad ediblər.
Dərnəyin sədri Musa Hacıyev səfirə yataqxanada məskunlaşmış
tələblərlə bağlı məlumat verib. Bildirib ki, Gürcüstan Gənclərinə
Yardım və Maarifləndirmə Dərnəyinin bu yataqxananı yaratmaqda
məqsədi Gürcüstanın bölgələrindən olan, Tbilisidə normal kirayə ev
tutmaq imkanı olmayan və ya sosial cəhətdən aztəminatlı ailələrdən
olan tələbələrə yardım göstərməkdir. Hazırda yataqxanada 67 tələbə
yaşayır. Onlara rahat yaşamaları, təhsil almaları üçün hər cür
şərait yaradılıb. Tələbələr hər gün 3 dəfə isti yeməklə də təmin
olunurlar. Hər bir tələbə ayda bütün xidmətlər üçün cəmi 250 lari
ödəyir.
Tələbələrə asudə vaxtlarının səmərəli təşkili məqsədilə
Azərbaycandan, Türkiyədən gələn və yerli mütəxəssislərlə görüşlər,
dəyirmi masalar təşkil olunur. Onlara boş vaxtlarda dini dərslər də
keçirilir.
Səfir Faiq Quliyev Azərbaycan dövlətinin Gürcüstandakı
soydaşlarımıza göstərdiyi diqqət və qayğı barədə məlumat verib.
Bildirib ki, Azərbaycan dövlətinin, Heydər Əliyev Fondunun, SOCAR
şirkətinin və digər Azərbaycan şirkətlərinin dəstəyi ilə
Gürcüstanda məktəblər, uşaq bağçaları, idman kompleksləri və başqa
sosial obyektlər tikilərək istifadəyə verilir, bəziləri isə əsaslı
təmir olunur. Ümumiyyətlə, SOCAR tərəfindən Gürcüstanda sosial
layihələrə 70 milyon dollara yaxın vəsait ödənilib. Hər il 1500-dən
çox tələbənin təhsil haqqı ödənilir. SOCAR bu ildən həmin
tələbələrin təhsilə marağını artırmaq üçün yeni layihə hazırlayıb.
Fəal və əlaçı tələbələrə mükafatlar veriləcək, tələbələrə
Gürcüstandakı Azərbaycan şirkətlərində təcrübə keçmək, ali
məktəbləri bitirən gənclərin işlə təmin olunmalarına dəstək
Göstəriləcək.
Səfir Gürcüstanda yaşayan soydaşlarımızın Birinci Qarabağ və 44
günlük Vətən müharibəsi zamanı göstərdiyi dəstəyi xüsusi qeyd edib.
Bildirib ki, Azərbaycan dövləti Gürcüstandan olan şəhid və qazi
ailələrinə yüksək qayğı göstərir. Səfirlik şəhidlərlə bağlı sənədli
film, kitab hazırlayıb. Səfirlik əməkdaşları həmin ailələri
mütəmadi olaraq ziyarət edir, onların qayğıları ilə maraqlanır,
yardım göstərirlər.
Sonra səfir tələbələri maraqlandıran sualları cavablandırıb.
Sonda tələbələr üçün iftar süfrəsi açılıb.
Mənbə: Azertag.az