პარლამენტმა ჰომოფობიური საკონსტიტუციო პროექტის საყოველთაო სახალხო განხილვის საორგანიზაციო კომისია შექმნა. კენჭისყრა დღეს, 16 აპრილს, პლენარულს სხდომაზე ჩატარდა და დადგენილებას 77-მა დეპუტატმა დაუჭირა მხარი.

კომისიის შემადგენლობაში შევლენ:

1. შალვა პაპუაშვილი – პარლამენტის თავმჯდომარე
2. მამუკა მდინარაძე – ფრაქცია „ქართული ოცნების“ თავმჯდომარე
3. რატი იონათამიშვილი – ადამიანის უფლებათა დაცვის კომიტეტის თავმჯდომარე
4. ირაკლი შატაკიშვილი – უმრავლესობის წევრი
5. მაკა ბოჭორიშვილი – ევროპასთან ინტეგრაციის კომიტეტის თავმჯდომარე
6. ანრი ოხანაშვილი – იურიდიული კომიტეტის თავმჯდომარე
7. დავით მათიკაშვილი – იურიდიული კომიტეტის თავმჯდომარის პირველი მოადგილე
8. სალომე ქურასბედიანი – გარემოს დაცვის კომიტეტის თავმჯდომარის მოადგილე
9. თენგიზ შარმანაშვილი – თავდაცვის კომიტეტის თავმჯდომარის მოადგილე
10. სოზარ სუბარი – „ხალხის ძალის“ ლიდერი
11. ფრიდონ ინჯია – „ევროპელი სოციალისტები“
12. შალვა კერესელიძე – „საქართველოსთვის“
13. კომისიის მდივანი – ნინო შავგულიძე

რეგლამენტის მიხედვით, საყოველთაო-სახალხო განხილვის საორგანიზაციო კომისია საქართველოს კონსტიტუციური კანონის პროექტის განხილვის დაწყებიდან ერთი თვის განმავლობაში განიხილავს ამ პროექტთან დაკავშირებულ მასალებს და განხილვის დაწყებიდან ერთი თვის შემდეგ ადგენს შემაჯამებელ ოქმს. კომისია საქართველოს კონსტიტუციური კანონის პროექტის განხილვის მიზნით, მოსახლეობის მაქსიმალური ინფორმირებისა და ჩართულობის პრინციპის გათვალისწინებით, მართავს შეხვედრებს საქართველოს სხვადასხვა ადმინისტრაციულ-ტერიტორიულ ერთეულში.

ჰომოფობიური კანონპროექტი საქართველოს კონსტიტუციაში ცვლილების შეტანის შესახებ და მასთან ერთად კონსტიტუციური კანონის პროექტი „ოჯახურ ღირებულებათა და არასრულწლოვანთა დაცვის შესახებ“ პარლამენტში 3 აპრილს დარეგისტრირდა.

---

„ქართული ოცნება“ კიდე ერთხელ აპირებს რუსული კანონის მიღებას, რომელიც 2023 წლის მარტში მასობრივი პროტესტის შედეგად უკან გაიწვიეს. „ქართულმა ოცნებამ“ გასულ წელს დადო პირობა, რომ რუსულ კანონს აღარ დაუბრუნდებოდნენ, მაგრამ პირობა დაარღვია. ქართულმა ოცნებამ კანონპროექტის პირვანდელი ფორმულირებიდან მხოლოდ სიტყვა "აგენტი" ამოიღო და ის უცხოური ძალის ინტერესების გამტარებლით შეცვალა.
კანონის მიხედვით, ყველა არასამთავრობო და მედიაორგანიზაცია, რომლის შემოსავლების 20%-ზე მეტი უცხოეთიდან არის მიღებული უცხოური ძალია ინტერესების გამტარებლად ჩაითვლება. სახელმწიფო არ გამოიკვლევს თუ რას საქმიანობენ და რა მიზნებს ემსახურებიან ეს ორგანიზაციები და მათ ყველას უცხოური ძალის ინტერესის გამტარებლად შერაცხავს.
კანონი მიმართულია ევროპასა და ამერიკისაგან შემოსულ დაფინანსებებზე და არა მტრულად განწყობილი ქვეყნებიდან შემოსულ დაფინანსებებზე, როგორც ეს ცივილიზებულ ქვეყნებშია.
კანონის ინიცირების გამო შეშფოთება გამოთქვეს ევროკავშირის წევრმა და საქართველოს მეგობარი ქვეყნების ლიდერებმა, რუსეთის პრეზიდენტის პრესმდივანმა კი „ქართული ოცნების“ კანონი მოიწონა.