ADA Universitetinin Gürcüstanda səfərdə olan məsul əməkdaşları
Tbilisidə bir sıra görüşlər keçiriblər.
ADA Universitetinin prorektoru Vəfa Kazdal və nümayəndə heyətinin
üzvləri bu gün Gürcüstan Texniki Universitetinin rektoru David
Qurqenidze ilə görüşüblər. Görüşdə ADA Universitetinin imkanları
barədə ətraflı məlumat verilib. ADA Universiteti ilə Gürcüstan
Texniki Universiteti arasında əməkdaşlıq məsələləri müzakirə
olunub. İki təhsil ocağı arasında müəllim və tələbə mübadiləsi və
s. məsələlər diqqət mərkəzində olub.
Sonra prorektor Vəfa Kazdal, Tələbə qəbulu şöbəsinin əməkdaşı
Mahnur Abbasova, Qazax Müəllimlər Seminariyasının layihə meneceri
Samirə Ağayeva Gürcüstanın müxtəlif ali məktəblərində təhsil alan
yerli azərbaycanlı tələbələrlə görüşüblər. SOCAR-ın Gürcüstan
nümayəndəliyinin Tbilisidəki baş ofisində keçirilən görüşdə ADA
Universitetinin yaranması, beynəlxalq əməkdaşlıq əlaqələri, tələbə
qəbulu qaydaları, təhsil və təqaüd proqramları, fakültələr,
tələbələr üçün yaradılmış imkanlar və üstünlüklər barədə ətraflı
məlumat təqdim olunub. SOCAR-ın məsul əməkdaşı Heydər Əliyev
Azərbaycan dövlətinin Gürcüstandakı soydaşlarımıza göstərdiyi
diqqət və qayğı barədə məlumat verib. Bildirib ki, SOCAR 2002-ci
ildən etibarən Gürcüstandakı soydaşlarımızın ali məktəblərə qəbul
olunmuş tələbələrin təhsil haqqını ödəyir. Hazırda azərbaycanlılar
Gürcüstanın 18 universitetində 40 fakültədə təhsil alırlar.
Tələbələrin təhsil haqqı bu ildən SOCAR-ın hazırladığı yeni proqram
üzrə ödənilir. Yeni proqram tələbələri təhsilə daha ciddi və
məsuliyyətli yanaşmağa sövq edir. Onun sözlərinə görə, əlaçı
tələbələr üçün mükafat fondu da yaradılıb.
Sonra tələbələri maraqlandıran suallara aydınlıq gətirilib.
Görüşlərdə Azərbaycanın Gürcüstandakı səfirliyinin məsul
əməkdaşları iştirak ediblər.
Qeyd edək ki, ADA Universitetinin əməkdaşları azərbaycanlıların
yığcam yaşadıqları bölgələrdə də görüşlər keçiriblər.
Mənbə: azertac.az