1 iyul tarixində “Lelo Gürcüstan üçün” partiyası Marneulidə
sayca iyirmi dördüncü rayon təşkilatını açdı.
Partiya sədri Mamuka Xazaradze “Marneuli” radiosuna müsahibəsində
“Lelo”nun planları və baxışları barədə söhbət açdı. Onun
bildirdiyinə görə, Gürcüstan hökuməti etnik azlıqların
inteqrasiyası üçün müvafiq tədbirlər həyata keçirmir.
“Bizim dövlətçilik yanaşmamız var və bu bütün
vətəndaşların Konstitusiya və qanunla təmin olunmuş
bərabərhüquqluluğu, hüquqlarının müdafiəsini nəzərdə tutur. Bizim
bir nömrəli yanaşmamız budur. İkinci odur ki, biz milli, dini
azlıqlara və ümumiyyətlə azlıqlara öz hüquqlarından yararlanmaqda
dəstək olmalıyıq. Məncə 21-ci əsrdə bu barədə danışmaq hətta
ayıbdır. Bu belə olmalıdır və bu münasibətə Dövlət Təhlükəsizlik
Xidməti və s. orqanlar müdaxilə etməməlidir. Belə problemlər
dövlətin zəif olduğu və azad adamların özünü ifadə etməsindən
qorxduğu yerlərdə baş verir”, – Mamuka Xazaradze
bildirdi.
Mamuka Xazaradzenin bəyanatına görə, əsas olan odur ki, partiyanın
çoxmillətli olmasını göstərmək üçün etnik azlıqlar partiya
siyahısına sünii şəkildə yazılmasın. Onun sözlərinə görə,
namizədləri onların soyadına görə deyil, siyasi fəallıq və
təhsilinə görə seçməlidirlər.
“Siz məndən də yaxşı bilirsiniz ki, Marneuli
bələdiyyəsində qohumluq bölgüsü var və yerli kadrlar da burada
azdır. Rustavidən, Tbilisidən adam gətirirlər. Bu yalnız sizin
problem deyil, müxtəlif bələdiyyələrdə bu problem mövcuddur. Dövlət
adamlara etibar etmir və əgər dövlət öz vətəndaşlarına inanmırsa,
dövlət və idarəetmə problemi var. Marneulidə bizim çox sayda
təhsilli adamlarımız var, niyə işləmək üçün Tbilisidən adam
gətiməliyik. Məsələn, prokuror və s. vəzifələrdə işləyirlər. Bu
deməkdir ki, sistem yararsızdır”, – Mamuka Xazaradze
“Marneuli” radiosuna müsahibəsində bildirdi.
Xazaradze etnik azlıqların dövlət dilini aşağı səviyyədə bilməsi
ilə bağlı dövlətin öhdəliyindən də söhbət açdı. Onun sözlərinə
görə, dövlət insanları dil bilməməkdə günahlandırmamalıdır.
“Bu günə qədər Marneuli əhalisinin bir qisminin dövlət
dilini bilməməsi dövlətin öhdəliyidir. Hollandiyaya emiqrant olaraq
getsən və pasport almaq istəsən, dili, tarixi öyrənməmiş
vətəndaşlıq vermirlər və bunun üçün dövlət ona kömək edir. Burada
məsələ başqadır. Söhbət pasportun verilməsi deyil. Burada dövlət
gürcü dilinin tədrisinə deyil, adamlara investisiya sərf etməlidir.
Dövlətin funksiyasını insanların öhdəsinə qoya
bilməzsən”, – Xazaradze bildirdi.
“Lelo Gürcüstan üçün” partiyasının sədri “Marneuli” radiosuna
müsahibəsində Davit Qareci məsələsindən də söhbət açdı. Onun
sözlərinə görə, Gürcüstanda yaşayan azərbaycanlıları Davit Qareci
probleminə görə günahlandırmaq səhvdir.
“Əgər dövlətsənsə və qonşu, qardaş dövlətlə münasibətin
varsa, düşünürəm ki, bu mövzu daha çox yanlış menecment
problemidir. Davit Qareci problemi Sovet İttifaqından gəlir və hələ
o zaman bunları müəyyən edə bilmədilər. Mən əminəm ki, belə
mövzular qaldırılan zaman həmişə üçüncü şəxsin müdaxiləsi olur.
Üçüncü əl vasitəsilə Marneulili azərbaycanlıları günahlandırırlar
ki, Marneulili azərbaycanlılar desin ki, bizim nə əlaqəmiz var.
Bununla da tarixən iki dövlət arasında formalaşmış münasibətə zərər
vurmaq istəyirlər. Mən düşünürəm ki, belə məsələnin bu səviyyəyə
çatması hər iki dövlətin utancıdır".
Müsahibənin sonunda “Lelo Gürcüstan üçün” partiyasının sədri 2020-
ci il Parlamen seçkilərində majoritar və proporsional namizədlər
haqqında da söhbət açdı. Onun sözlərinə görə, Marneulidə majoritar
deputatlığa kimin namizəd olacağı hələ məlum deyil.