Marneulinin iki klinikasında 34 nəfər kovid xəstəsi müalicə alır. Marneulidəki “Aversi” klinikasının meneceri Manana Kapnadenin sözlərinə görə, klinikada ümumilikdə 28 xəstə müalicə olunur.

"Müalicə şöbəsində 14 xəstəmiz var, onlardan 9-u uşaqdır. 14 xəstə isə reanimasiyadadır. Qeyd edək ki, bizə Gürcüstanın bütün regionlarından kovid xəstələri gəlir", – Kapandze bildirdi.

Daha bir tibb müəssisəsinin, Marneuli “Geo Hospitals” klinikasından bildirdilər ki, bu günə olan məlumata görə, cəmi 6 xəstə müalicə alır. Tibb müəssisəsinin kliniki direktoru Tata Şenqelaia bildirdi ki, gün ərzində bir və ya iki nəfərdə virus aşkarlanır.

"Yoluxma halları ciddi şəkildə azalıb. Reanimasiyada 2 xəstəmiz, müalicə şöbəsində isə 4 xəstə var. Reanimasiyaya yerləşdirilənlər əsasən başqa xəstəlikdən əziyyət çəkirlər, yaxud yaşlı insanlardır", – Şenqelaia bildirdi.

Son 24 saat ərzində Gürcüstanda 2783 nəfər virusa yoluxub. 5450 nəfər sağalıb, 32 xəstə dünyasını dəyişib.