Marneulidə sahibsiz itlərin çoxluğundan narahat olan vətəndaşlar diqqət tələb edir. Rustaveli küçəsində yaşayan, adının hallanmasını istəməyən sakin “Marneuli” radiosu ilə söhbəti zamanı bildirdi ki, itlərin bir qismi aqressivdir və buna görə onun övladları tez-tez evə qorxmuş vəziyyətdə gəlirlər. Küçə sakinlərinin sözlərinə görə, bu zaman kimə müraciət edəcəklərini də bilmirlər.

“Uşaqlar axşam rəqsə getmişdilər, evə ağlayaraq, qorxmuş vəziyyətdə

gəldilər. Bu dəfələrlə baş verib. Bu problem yalnız bizdə deyil. İllərdir, bu məsələ ciddi şəkildə var, bu zaman kimə müraciət edəcəyimizi də bilmirik ki, itləri aparsınlar”.

Sahibsiz itlərin sığınacağa aparılması öhdəliyini daşıyan qurumlardan biri Marneuli meriyasıdır. Bələdiyyənin Əmlak İdarəsi Xidmətinin rəhbəri Davit Xarşiladze deyir ki, belə hallarda vətəndaşlar Marneuli meriyasının qaynar xəttinə zəng vurmalıdırlar.