Marneuli bələdiyyəsinin Saimerlo kənd təsərrüfatlarında suvarma
suyu probleminə görə, şitillər xarab olur.
Yerli fermerlərin “Marneuli” radiosuna verdiyi məlumata görə, açıq
torpaqda kələm şitillərini ötən həftə çıxarmalı idilər. Saimerlodan
əlavə Tsereteli, Kürtlər, Baydar və digər ətraf kəndlərdə də su
problemi var.
“Bir qismini neçə gün əvvəl çıxardım, ancaq suya görə,
çox əziyyət çəkdim. İndi artıq vaxtında çıxarmasam, şitillər xarab
olacaq. Bahalı toxum səpmişəm, bu qədər pul xərcləmişəm, bunun
istiliyini təmin etmək üçün gecələri səhərə kimi yatmamışam. Bu
qədər zəhmətin puç olur. Su nə zaman olacaq, heç olmasa onu
desinlər, bilim”, – təsərrüfatçı deyir.
“Bütün qışı şitillərin becərilməsinə sərf edirik.
Ümidimiz var ki, yazda şitilləri daha böyük sahəyə çıxaracağıq və
becərəcəyik. Bir neçə gündür, su gözləyirik, bəlkə tez versinlər
ki, bizim əməyimiz suya düşməsin”.
Gürcüstan Meliorasiya, Xram-Debet Marneuli Xidmət Mərkəzinin
rəhbəri Aleksandr Şukakidze “Marneuli” radiosu ilə söhbəti zamanı
bildirdi ki, suvarma suyu təmir işlərinə görə dayandırılıbmış və
əhaliyə bu gündən su veriləcək.
“Dünən rəhbərliklə söhbətimiz oldu, bu gündən suvarma
suyu olacaq. Kolagir kəndində bərpa işləri aparılırdı, ona görə
dayandırmışdıq ki, təsərrüfatlara su verək”, –
Şukakidze bildirdi.
Marneuli bələdiyyəsinin kəndlərində əhalinin əksəriyyəti kənd
təsərrüfatı ilə məşğuldur və məhz indi tərəvəzın açıq torpağa
çıxarılması prosesi aparılır. Buna görə də yerlilərə suvarma suyu
lazımdır.