Marneulinin şəhər mərkəzindən keçərək bazar ərazisinə gedə
bəiləcəyin və ya Sadaxlı şossesinə keçmək üçün ən çox istifadə
olunan yollarından biri Jordaniya küçəsidir. Yolun kənarında həyət
evləri və ticarət obyektləri var.
Ərazidən dəmir yolu keçir. Marneulidə yarımçıq qalmış kanalizasiya
layihəsi artıq iki ildir ki, yolları sıradan çıxmış vəziyyətdə
qoyub. Maşınlar yolun bir kənarında qalmış asfalt yolu bir-birinə
güzəştə getməməyə çalışırlar. Əks halda maşını dərin çuxurlardan
keçirməli olursan. Rövşən Qəhrəmanov Jordaniya küçəsindəki
döngələrdən birində yaşayır. O, bildirir ki, sıradan çıxmış
yolların problemi, su təchizatı-kanalizasiya sisteminin tikintisi
zamanı daha da pisləşib.
“30 ildən artıqdır ki, burada yaşayıram. İçməli su
boruları dəyişdirilməyib, su həftədə bir dəfə palçıqlı gəlir və
bəzən heç bir dəfə də gəlmir. Yağışlı havada həyətdən bayıra
çıxanda həmişə palçığa batırıq. Günəş olanda isə dəhşətli toz olur,
bu vəziyyət bizi narahat edir. Nə zaman başa çatacaq,
bilmirik”, - Qəhrəmanov bildirdi.
Artyom Qevorqizov mağaza açıb. O, “Marneuli” radiosu ilə söhbəti
zamanı bildirdi ki, yolun bir hissəsi xarab olmuş asfaltdır, digər
hissəsinə isə çınqıl tökülüb. Bu isə avtomobillərə və piyadalara
narahatçılıq yaradır.
“Yolun yarısını qazdılar, buradan boru çəkməyə
başladılar, sonra isə həmin qazılmış tərəfə çınqıl tökdülər. Bir
hissəsində asfalt qaldı, ancaq dar hissədir. Bir dəfə maşın
keçirdi, təkərin altından daş çıxdı, mağazamın qapısına dəydi, şüşə
sındı. Bu ziyanı kim ödəyəcək, yaxud ümumiyyətlə bu yolu təmir
edəcəklərmi”, - Artyom Qevorqizov bildirdi.
Üç ildən artıqdır ki, Marneulidə su təchizatı-kanalizasiya
sisteminin tikintisinə başlanılıb. Layihə bir neçə aydır
dayandırılıb. Layihəni həyata keçirən şirkət razılaşma şərtlərini
pozub. Marneulidə başa çatmamış su təchizatı sistemi məsələsini bu
gün Bələdiyyə Məclisinin bu gün baş tutan iclasında VMH-ın üzvü
Laşa Kveladze yenidən qaldırdı və Bələdiyyə Məclisi sədrinə qeyd
olunan layihənin nə zaman başa çatacağı ilə bağlı sualla müraciət
etdi. Marneuli Bələdiyyə Məclisinin sədri Amiran Qiorqadze bildirdi
ki, indiki mərhələdə məhkəmə prosesi aparıır və bundan sonra
layihənin nə zaman başa çatacağı məlum olacaq.
“Bu məsələ ilə bağlı dəfələrlə söhbətimiz olub. Akelik
su və kanalizasiyanın qurulması işlərinə başladı. İşin yarısını
yerinə yetirdilər və dayandırdılar. Bu təşkilatla bağlı araşdırma
aparılır, iş məhkəməyə göndərilib. Bu işləri davam etdirəcək şirkət
olan halda tenderin elan edilməsi istisna deyil. Yaxud ehtimal var
ki, yenidən Akelik özü işləri tamamlasın. Bu mövzu məhkəmə
prosesindədir. Bələdiyyə bu layihə üçün hələ pul ayıra bilməz,
asflat çəkilə bilməz. Çünki su və kanalizasiya sistemi qaydaya
salınmalıdır. Ona qədər oraya asflat qatı çəkilməsi düzgün olmaz.
Çünki sonra yenidən örtülməlidir, bu prosesə bölgə və mərkəzi
quberniya qoşulub”, - Qiorqadze bildirdi.
Asiya İnkişaf Bankı su təchizatı-kanalizasiya sisteminin tikilməsi
layihəsinə "Şəhər xidmətinin yaxşılaşdırılmasına investisiya
qoyulması" proqramı çərçivəsində 55 940 022 dollar ayırıb. Tikinti
işlərini Azərbaycan şirkəti “Akelik Group” həyata keçirirdi.