Big Idea Challenge - video müsabiqəsi gənclərə ideyalarını
həyata keçirməkdə kömək edir. Marneulili Gülgün Məmmədxanovanın
ideyası həmin müsabiqənin final mərhələsinə keçib.
Gülgünün “Marneuli” radiosuna bildirdiyinə görə, onun ideyası gürcü
dilinin tədrisi və populyarlaşdırılması ilə bağlıdır. Bu ideya
Gürcüstanda yaşayan etnik azlıqların gürcü dilini öyrənməsinə
dəstək olacaq.
"Sosial şəbəkədə belə müsabiqə haqqında məlumat oxudum.
Bu Böyük Britaniya Şurası tərəfindən keçirilir və gənclər üçündür.
Kimin ideyası var və həyata keçirmək istəyirsə, maddi dəstəyə
ehtiyacı varsa, qoşula bilər. Biz müsabiqəyə ideyamızı təqdim
etdik. Gürcüstandan ümumilikdə 9 ideyanı finala seçiblər. Mariam
Qori bələdiyyəsindəndir və gənc işçidir. Mən isə Marneuli
bələdiyyəsindənəm. Mariamla mənim ideyam belədir: Biz gürcü dili
tədrisi platforması yaradırıq və orada gürcü dili müəllimlərini,
hədəf auditoriyanı, etnik azərbaycanlı, erməni əhalini
əlaqələndirəcəyik. Eləcə də, gürcüdilli adamlar da müəllim kimi
platformada qeydiyyatdan keçəcəklər və maraqlanan şəxslərə gürcü
dilini tədris edəcəklər", – Gülgün bildirdi.
Gülgün Məmmədxanova və Mariam İspirianinin ideyası qalib gələrsə,
3000 funt sterlinqə qədər pul əldə edəcəklər. Gülgün "Marneuli"
radiosuna bildirdi ki,
dəstəkçilər müsabiqədə iştirak edənlərə sosial
şəbəkə vasitəsi ilə səs verə bilərlər.
“Video-pich” müsabiqəsi Idea Challenge proqramında iştirak edən
ölkə gənclərinə öz innovativ başlanğıclarını yaratmaq və dünyaya
tanıtmaq şəraiti yaradır. Müsabiqə üç kateqoriyada keçirilir:
sosial təsir, yaradıcılıq, rəqəmsal texnologiyalar.