Mağalaşvili körpüsünün bərpası yanvar ayının sonuna qədər başa çatacaq – şirkət rəhbəri
12:27 / 08.01.2024
Marneuli şəhərində Durmuşxan Mağalaşvili adına körpünün bərpası
işləri hələ də aparılır.
30 noyabr tarixindən Mağalaşvili körpüsündə hərəkət
məhdudlaşdırılıb. Bu isə şəhərdə tıxacların yaranmasına səbəb
olub.
Marneuli meriyasından ilk mərhələdə bildiriblər ki, körpüdə
avtomobillərin hərəkəti 20 dekabr tarixindən bərpa olunacaq. Sonra
isə körpüdə hərəkətin yeni ilə qədər bərpa olunacağını vəd
etmişdilər. Amma maşınların körpüdə hərəkəti hələ də bərpa
olunmayıb.
Durmuşxan Mağalaşvili adına körpünün bərpası işlərini həyata
keçirən “İrlani” MMC şirkətinin rəhbəri Temur Tabukaşvili bildirib
ki, körpünün bərpası işləri yanvarın sonuna qədər başa
çatdırılacaq.
“Bütövlükdə ayın sonuna qədər başa çatdırılacaq.
Hərəkət hissəsinin açılması ilə əlaqədar hələ yenilik yoxdur, yeni
il günləri olduğuna görə asfalt hazırlayan zavodlar işləmirdi,
zavodların açılmasını gözləyirik, sonra asfalt
çəkiləcək”, – Temur Tabukaşvili bildirib.
Marneuli şəhərində Durmuşxan Mağalaşvili adına körpünün bərpası
işlərini “İrlani” MMC 1 878 333 lariyə həyata keçirir. İşlər beş
aydan artıqdır, davam edir. Marneuli meriyası şirkətlə 2023-cü ilin
5 may tarixində müqavilə bağlayıb. Müqaviləyə görə, işlərin başa
çatdırılması müddəti olaraq 150 gün, təxminən 5 ay müəyyən edilib.
Meriya və “İrlani” MMC arasında 5 may tarixində bağlanmış
müqavilədə 12 oktyabr tarixində dəyişiklik edilib. Dəyişikliyə
əsasən, şirkətə işləri həyata keçirmək üçün 25 dekabra qədər vaxt
verilmişdi.
Qeyd edək ki, Marneuli meriyası körpünün bağlanmasına görə yaranmış
tıxacları yüngülləşdirmək üçün Mağalaşvili körpüsünün altından
müvəqqəti dəmiryolu keçidi də düzəldib.