Marneuli yerli özünüidarəsi Sadaxlı kəndində daxili yollara asfalt
qatının çəkilməsini və Xocorni kənd küçələrinin bərpasını
planlaşdırır.
Meriya kəndlərdə yollara asfalt qatının çəkilməsi işləri üçün 11
yanvar tarixində tender elan edib.
Meriya tərəfindən elan edilmiş tenderə görə, Sadaxlı kəndində
daxili yolların bərpası 6 hissədə, Xocorni kəndində isə 2 hissədə
planlaşdırılır.
“Yerinə yetirilən işlərin keyfiyyət dərəcəsinin zəmanət
müddəti yekun təhvil-təslim aktının bağlanmasından sonra 3 ildir.
Zəmanət müddəti ərzində istismar prosesində hansısa çatışmazlıqlar
aşkarlandığı halda təchizatçı bildirişi aldıqdan sonra alıcının
müəyyən etdiyi uyğun müddət ərzində çatışmazlığı/qüsuru öz hesabına
düzəltməyə borcludur”, – tender təklifində qeyd
olunub.
Marneuli yerli özünüidarəsi Sadaxlı və Xocorni kəndlərində daxili
yolların bərpası işlərinin alınmasına 837 872 lari xərcləməyi
planlaşdırır.
Tender sənədlərinə görə, layihənin 95% dövlət, 5% isə yerli
büdcədən maliyyələşdirilir.
Sadaxlı kəndinin daxili yollarının bərpası və Xocorni küçələrinin
bərpası işləri ilə bağlı tenderdə iştirak etmək istəyən şirkətlər
təkliflərini 1 fevraldan 6 fevral tarixində qədər təqdim edə
bilərlər. Tenderdə qalib gələn şirkət müqavilə bağlandıqdan 120 gün
ərzində işləri təhvil verməlidir.