“Gürcü Arzusu” 20 iyul tarixində Marneuli və Qardabanidən
majoritar deputatlığa namizəd olaraq Marneuli meri Zaur Darğallını
təqdim edib.
Gürcüstanın seçki məcəlləsinə əsasən fəaliyyətdə olan merin
seçkilərdə iştirak etmək hüququ yoxdur və buna görə Marneuli meri
statusunu dayandırmalıdır.
Marneuli meri Zaur Darğallı “Marneuli” radiosuna bildirdi ki, mer
statusunun dayandırılması üçün tarix dəqiqləşdirilməyib.
Beynəlxalq Şəffaflıq Gürcüstanın baş hüquqşünası Qiqi Çixladze
“Marneuli” radisou ilə söhbəti zamanı bildirdi ki, Gürcüstan
qanunvericiliyinə əsasən majoritar namizdlər seçkidə iştirak etmək
üçün MSK-da seçkiyə 30 gün qalmış qeydiyyatdan keçməlidirlər.
“Ona qədər də qeydiyyatdan keçə bilərlər, ancaq
seçkilərə 30 gün qalmış son müddətdir. Nəzəri olaraq onlar bu
müddətdən istifadə edə bilər və sonuncu məqama qədər qeydiyyatdan
keçməzlər”,– Qiqi Çixladze dedi.
2020-ci ilin Parlament seçkiləri güman ki, 30 oktyabr tarixində baş
tutacaq. Zaur Darğallı müvafiq olaraq 30 sentyabra qədər mer
statusunu dayandırmalıdır.
“Seçki məcəlləsinə uyğun olaraq o, qeydiyyatdan keçdiyi günün
səhəri mer statusunu dayandırmalıdır. Dayandırmalıdır deməkdir ki,
o, ərizə yazmalı və merlikdən istefa etməlidir. Onun öhdəliyini
birinci müavini həyata keçirəcək. Bu deməkdir ki, Marneulidə artıq
mer seçilməyəcək və təxminən il yarım ərzində Marneulinin meri
öhdəliyini merin birinci müavini həyata keçirəcək”, –
Qiqi Çixladze dedi.
Gürcüstanda yerli özünüidarəetmə seçkiləri 2021-ci ilin oktyabrında
keçiriləcək. Əgər Marneuli meri 2020-ci ili parlament seçkilərində
qalib gəlməsə onun mer statusunu bərpa etmək imkanı olmayacaq.