Marneulinin Şaumiyani kəndində olan qaçqınlar məntəqəsində
hazırda koronavirusa yoluxan şəxsin təmasları araşdırılır.
Marneuli merinin səlahiyyətini icra edən Zaur Tabatadze “Marneuli”
radiosu ilə söhbəti zamanı bildirdi ki, bu gün, 24 sentyabr
tarixində koronavirusa yoluxan şəxsin təmasda olduğu insanlardan
virusla bağlı analiz götürəcəklər.
“Bu gün analiz götürüləcək və analizin cavabları gəldikdən sonra
qərar qəbul edəcəyik. Yoluxanın təmaslarının bir qismi karantin
sahəsinə aparıla bir qismi isə ictimai səhiyyə mərkəzinin nəzarəti
altında özünütəcriddə qala bilər”, – Tabatadze
dedi.
Marneulidə koronavirusa yoluxma halı “Aversi” klinikasında qeydə
alınıb.
Klinikanın direktoru Manana Kapanadzenin sözlərinə görə, xəstə
onların klinikasına 23 sentyabr tarixində yerləşdirilib. Virusa
yoluxan şəxs Marneuli bələdiyyəsinin Şaumiyani kəndinin qaçqınlar
məntəqəsinin sakinidir.
“Klinikanın daxili qaydasına görə bütün xəstələrə potensial virusa
yoluxan xəstə kimi xidmət göstəririk. Ona görə də bizim bütün
əməkdaşlarımız xəstələrə müvafiq qaydada geyinərək xidmət
göstərirlər. Həmin xəstənin şikayətlərindən virusa yoluxması
ehtimal olunurdu. Ona görə analiz götürdük və müsbət cavab gəldi.
Prosesə epidemioloqlar qoşulub. Təmasların müəyyənləşdirilməsi
prosesi aparılır. Xəstə virusa yoluxanlar üçün klinikaya
yerləşdiriləcək. Hazırda özünütəcrid palatasındadır”,
– Manana Kapanadze dedi.
Bir neçə aydır ki, Marneulidə koronavirusa yoluxma halı qeydə
alınmayıb.
Bu gün ölkə miqyasında yeni yoluxanların sayı 259 nəfərdir.