Marneuli bələdiyyəsinin Böyük Bəylər kənd sakinləri bu gün ilk dəfə
“Marneuli” radiosundan eşitdilər ki, Bələdiyyə Məclisinin 4 aprel
tarixinə olan qərarı ilə onların kəndində vəd verilmiş suvarma
kanalından keçid körpüsünün qurulması əvəzində yola çınqıl
tökəcəklər.
Marneuli Bələdiyyə Məclisinin Məkan-Ərazi Planlaşdırılması və
İnfrastruktur Komissiyasının sədri Adil Əliyev Bələdiyyə Məclisinin
iclasında çıxışı zamanı deputatlara bildirib ki, 2023-cü ilin kəndə
dəstəkk proqramı çərçivəsində iki layihənin dəyişdirilməsini,
bəyənilməsini ərizə ilə tələb edirlər. Bunlar Böyük Bəylər kəndində
suvarma kanalından keçid körpüsü və Verxviani kəndində sus sitemi
əvəzinə yola çınqıl tökülməsidir.
Böyük Bəylərə getdik və kəndin bütün məntəqələrində olduq. Əhalidən
layihənin dəyişdirilməsi barədə məlumatlarının olub olmamasını
soruşduq. Sorğuda iştirak edənlərin əksəriyyəti inanırdı ki, yaxın
zamanda körpünün tikintisinə onsuz da başlanılacaqdı. Çünki
körpünün düzəldilməsini ötən il dəstəkləyiblər. Onlar deyirlər ki,
körpünün tikintisi üçün hissələr artıq kəndə aparılıb və layihənin
dəyişdirilməsi haqda heç nə bilmirlər.
“İndi sizin dediyinizi ilk dəfə eşidirəm. Bu bərabər dəyişiklik
deyil, layihəni dəyişmək ədalətsizlikdir. Hesab edin ki, qızıl
taxta ilə əvəz olunub. Çınqılı əhali də tökə bilər, əvvəl də bunu
öz vəsaitimizlə edirdik. Həm də bu 10 il əvvəl aktual idi və indi
kəndin çox hissəsində yola asfalt qatı çəkilib. Mənim fikrimcə
çınqıl tökmək texnoloji baxımdan çox asandır, elementardır və körpü
çətindir, öz gücümüzlə düzəldə bilmərik. Çınqıl məsələsinə sonrakı
layihələrimizdə də qayıdacağıq, körpünü yüz il tikə bilməyəcəyik.
Düzünü desəm, mən toplantıda iştirak etdim. Soruşmaq lazımdır əhali
tərəfindən dəyişdirilib, yoxsa qərar yuxarıdan qəbul olunub. Hələ
nəyin əsasında baş verdiyini aydınlaşdırın”- Ayvaz
Qəhrəmanov bildirdi.
“Dəyişiklik barədə məlumatım yoxdur. Mən bilirəm ki, körpü
düzəldəcəkdilər və artıq borular da gətirilib. Başqa heç nə
bilmirəm”- kənd sakini olan qadınlardan biri
deyir.
“Mən bildiyimə görə, bu körpü üçün vəsait artıq
ayrılıb. Mən istəyirəm körpü düzəldilsin. Burada çox adam yaşayır.
Toy, yas yeri olanda o biri yol ilə fırlanıb getməlidirlər? Bu
körpü vacibdir. Biz dəyişiklik haqda heç nə bilmirik, gizli
edirlər. Çınqıl tökürlər və bir il ərzində yağış yuyub aparır”.
“Körpü layihəsi 2022-ci ildə seçilmişdi, amma hələ də hazır deyil.
Bizim tərəfimizdən ərizə verilməsi yalandır. Səhv deyiblər, çınqıl
tökülmə məsələsini biz bilmirik. Bu barədə məlumatım yoxdur.
Ərizəni kimin verdiyini də bilmirəm”- Əli Əmiraslanov
bildirib.
“Ötən il körpünün düzəldilməsini dəstəkləmişdik və bu il yol
seçilib. Körpü üçün material artıq 7 ay əvvəl gətirilib. Bu il yola
çınqıl tökülməsi layihəsini dəstəkləmişik, yoxsa dəyişiklik
edilməyib. Körpü layihəsi artıq hazırdır və ləğv edə bilməzlər.
Mənim dəyişiklik barədə məlumatım yoxdur”- kənd sakini olan kişi
deyir.
“Kəndə ayrılmış pul hara getdi? Boruları gətirəndə dedilər ki, indi
düzəldəcəklər. Vaxtı uzadıblar”- Böyük Bəylər sakini
olan qadın deyir.
“Körpünü də deyirlər yolu da – bilmirəm, kişilər daha yaxşı bilər”-
yerli sakinlərdən olan qadın deyir.
Məsələnin müzakirəyə çıxaran Adil Əliyev “Marneuli” radiosu ilə
söhbəti zamanı bildirdi ki, o, əhalinin ərizəsini görməyib. Çünki
Bələdiyyə Məclisinə məktubla meriya müraciət edib və məsələnin
iclasa çıxarılmasını tələb edib.
“Marneuli meriyası məktub göndərib, dəyişiklik tələb edib.Məktubda
əhalinin tələbi əsasında qeyd olunub. Mənim öhdəliyim yazılmış
məktubu Bələdiyyə Məclisi iclasına çıxarmağımdır. Blok etmək
hüququm yoxdur. Əhalinin məktubu bizə gəlmir. Meriyadan məktub
gəldi və onun əsasında Bələdiyyə Məclisinə çıxarmalıyam. Çıxardım
və razılıq aldıq. Məsələni araşdırmaq meriyanın səlahiyyətlərinə
daxildir. Yaxşı olar meriyaya müraciət edəsiniz”-
Adil Əliyev bildirib.
“Marneuli” radiosu məsələni araşdırmaq üçün yerli özünüidarəyə zəng
vurdu. Meriyanın PR xidmətindən bildirdilər ki, suala yazılı
müraciət etsək cavab ala bilərik. Kənd nümayəndəsi ilə məlumatı
aydınlaşdırmağa çalışdıq, ancaq bir neçə cəhdə baxmayaraq onunla
əlaqə saxlaya bilmədik.