Prezident Co Bayden 2024-cü il seçkisində ikinci müddətə seçilmək
üçün namizədliyini verəcəyini bəyan edib.
O bu barədə özünün Twitter hesabından da yazıb:
"Hər bir nəslin elə bir anı olur ki, demokratiyanı müdafiə etmək
lazım gəlir. Əsas azadlıqlarımızı müdafiə etmək lazım gəlir. Mən
inanıram ki, bu, bizim işimizdir. Məhz buna görə də ABŞ prezidenti
seçkisində iştiraka hazırlaşıram. Mənə qoşulun. Gəlin bu işi başa
çatdıraq”.
Vitse-prezident Kamala Harris də 2024-cü il seçkisində Co Baydenlə
birlikdə iştirak edəcəyini bildirib.
Baydenin ehtimal edilən ikinci prezidentlik müddətinin sonunda 86
yaşı olacaq.
O inanır ki, birinci müddətdə əldə etdiyi qanunvericilik uğurları
və siyasətdə 50 illik təcrübəsi onun yaşından daha mühüm
amillərdir.
Şərhçilərin fikrincə Demokratik Partiya daxilində onun ciddi rəqibi
olmasa da, ölkədə kəskin parçalanmanın olduğu bir şəraitdə o öz
kürsüsünü qoruyub saxlamaq üçün ağır mübarizəyə girişməli
olacaq.
Yenə də Trampla üz-üzə?
Co Baydenin aprelin 25-də verdiyi bəyanat onun 2019-cu ildə
namizədliyini elan etməsinin dördüncü ildönümünə təsadüf edir.
Bayden o vaxt vəd etmişdi ki, Donald Trampın təlatümlü
prezidentliyindən sonra “ölkənin qəlbini” sağaltmağa çalışacaq.
Şərhçilər bildirirlər ki, Bayden hələ ki bu məqsədinə çata
bilməyib.
Ötən ilin mövsümarası seçkisində demokratların gözlənildiyindən
daha yaxşı nəticə göstərməsindən sonra Baydenin öz partiyasında
siyasi mövqeyi sabitləşib.
Respublikaçıların prezidentliyə namizədləri sırasında keçmiş
prezident, 76 yaşlı Donald Tramp ən populyar fiqur olaraq
qalır.
Beləliklə bu seçkidə də 2020-ci ilin qızğın seçki kampaniyası
yaşana bilər.
Amma bu da deyilməlidir ki, ötən bir neçə ildə Tramp ciddi
maneələrlə üzləşib.
O ABŞ tarixində barəsində cinayət ittihamı irəli sürülmüş ilk
keçmiş prezident olub.
Co Bayden 2021-ci ildə ABŞ-ın 46 prezidenti olub və Amerika
tarixində ən yaşlı dövlət başçısıdır.