სიახლე
"მე ვარ ყველა მარნეულელის დეპუტატი, განურჩევლად რელიგიისა თუ ეროვნებისა"- თამაზ ნავერიანი ქსენოფობიურ განცხადებებს ეხმაურება
ქსენოფობიური შინაარსის კომენტარები სოციალურ ქსელში მას შემდეგ ვრცელდება, რაც საზოგადოებამ მარნეულში დადასტურებული კორონავირუსით ინფიცირების ფაქტი გაიგო. დასნებოვნებული ქალის ეთნიკურობას არაერთი უსვამს ხაზს და აზერბაიჯანელების მიმართ აგრესიას გამოხატავს.

მარნეულის მაჟორტირატი დეპუტატი თამაზ ნავერიანი დღეს, 29 მარტს,  პირად ფეისბუქ გვერდზე, განვითარებულ მოვლენებს ერთი კვირის შემდეგ ეხმაურება:

"დღეს კაცობრიობას რთული დრო უდგას.
28 600-ზე მეტი გარდაცვლილი და 622 ათასამდე ინფიცირებული – ასეთია „კოვიდ 19“-ის პანდემიის ახლანდელი მონაცემები მსოფლიოს მასშტაბით. ჩვენი სახელმწიფო წარმატებით ებრძვის ვირუსის გავრცელებას. ჩვენი ექიმების პროფესიონალიზმი და თავგანწირვა სამაგალითოა მსოფლიოს წამყვანი ქვეყნებისთვის.


ასეთ დროს სახელმწიფოს სჭირდება ერთიანობა, კანონმორჩილება და ექიმების ინსტრუქციების გათვალისწინება. ჩვენივე უსაფრთხოებისთვის კარანტინშია მარნეულის მუნიციპალიტეტი, რომლის დეპუტატიც გახლავართ მე. მივმართავ იმ ადამიანების ჯგუფს, რომლებიც ცდილობენ მავნებლურად გამოიყენონ ეს მძიმე ვითარება, სოციალურ ქსელსა თუ სხვა სივრცეებში ეთნიკური, კუთხური და კულტურული თავისებურებების ნიშნით შეურაცხმყოფელ განცხადებებს აკეთებენ, სიძულვილის ენით ესაუბრებიან ერთმანეთს, აღვივებენ კონფლიქტს ამ მძიმე სიტუაციაში, როცა ისედაც ყველა აღელვებულია.

მივმართავ მათ, რომ შეწყვიტონ ეს გამიზნული თუ გაუმიზნავი ბოროტმოქმედება. გარწმუნებთ, რომ კანონის მთელი სიმკაცრით დაისჯება ყველა, ვინც სახელმწიფო ინტერესების დააზიანებას ეცდება ჩვენს მრავალეთნიკურ რეგიონში. მე ვარ ყველა მარნეულელის დეპუტატი განურჩევლად რელიგიისა თუ ეროვნებისა, ყველა მოქალაქის დეპუტატი, რომელიც აქ ცხოვრობს. მოგიწოდებთ, თავი შეიკავოთ აგრესიული გამონათქვამებისა და შეურაცხყოფების გავრცელებისგან, ამით ხელს უწყობთ იმ ადამიანების მავნებლურ ქმედებას, რომლებიც ცდილობენ რეგიონში სიტუაციის დაძაბვას.

ჩემო ძვირფასო მარნეულელებო, აუცილებლად დავძლევთ ამ ეპიდემიას. შევასრულოთ ექიმების ინსტრუქციები. დავემორჩილოთ კანონს.

დარჩით სახლში. ჩვენ 24 საათიანი რეჟიმით ვმუშაობთ თქვენთვის. ყველაფერი იქნება კარგად, თუ ყველა ჩვენგანი დაემორჩილება კანონს."
-  წერს თამაზ ნავერიანი საკუთარ ფეისბუქ გვერდზე

ამავე თემაზე:

კორონავირუსის ახალი სიმპტომი - ქსენოფობია

ოტო აღებულია თამაზ ნავერიანის ფეისბუქ გვერდიდან.
FaceBook Twitter Google
მსგავსი სიახლეები
დაიცავი დისტანცია