Marneuli rayonunun Ağməmmədli kəndinin sakinlərini daxili
yollarının bərbad olması və zibil yeşiklərinin olmaması narahat
edir. Sakinlərin sözlərinə görə, kəndin bir çox küçələrində
vəziyyət çox pisdir.
Yağış yağan zaman həmin küçələrdə hərəkət etmək çətin olur. Kənd
sakinlərinin dediyinə görə, dəfələrlə yerli icra nümayəndəsinə və
kənd deputatına məlumat veriblər. Amma bu günə qədər onların
problemləri həll olunmamış qalır.
Ağməmmədli kəndində yaşayan Fikrət Ayvazov bir neçə ildir ki, yeni
ev tikdirib. O, hazırda tikdirdiyi evə köçüb və orada yaşayır. Onun
bildirdiyinə görə, o, evi tikən vaxt həmin ərazidə qaz, işıq
olmayıb. O, öz hesabına qaz, işıq xətləri çəkdirib. Onun evinə
gedən yolun bərbad olmasına görə, indi o, yola bir neçə maşın
torpaq tökdürüb. Ayvazov deyir ki, əlavə gəliri yoxdur ki, öz
hesabına yollarını bərpa etdirsin. O, onu da əlavə etdi ki, onun
yaşadığı ərazidə zibil yeşiyi yoxdur.
Kənddə küçə işıqlarının yetərsiz olmasından şikayətlənən 59 yaşlı
Məharət Məmmədovun dediyinə görə, kəndin mərkəzinə küçə işıqları
çəkilir, kənar məhəllələrə çəkilmir.
Məsələyə aydınlıq gətirmək üçün Qasımlı inzibati ərazi vahidliyinin
deputatı Əşrəf Tükənova müraciət etdik. O, “Marneuli” radiosu ilə
söhbəti zamanı bildirdi ki, kənddə problemlər çoxdur. Amma tədricən
həm problemlər öz həllini tapır. Tükənovun dediyinə görə, küçələrin
işıqlandırılması üçün ötən ilin büdcədən 20 000 lari pul ayrılmışdı
və həmin vəsaitlə kəndin müəyyən hissələrinə küçə işıqları çəkildi.
Deputat onu da əlavə etdi ki, kəndin küçələrinin işıqlandırılması
işlərinin sona çatırılması üçün 85 ədəd plafon lazımdır. Bu da
növbəti ildə öz həllini tapacaq.
Tükənov onu da bildirdi ki, Ağməmmədli kəndinə 15 ədəd zibil qutusu
ayrılıb. Amma nə vaxt gətiriləcəyini bilmir. Deputat ümid edir ki,
yaxın vaxtlarda zibil yeşikləri kəndə gətiriləcək.
Əşrəf Tükənov onu da əlavə etdi ki, kəndin yaxınlığından keçən
kanalın ətrafında olan tulantıların təmizlənməsi üçün aidiyyəti
orqanlara bildirib. Yaxın vaxtlarda o ərazilər təmizlənəcək. Həmin
küçəyə 5 maşın çınqılın tökülməsinin planlaşdırıldığını deyən
deputat qeyd etdi ki, o da yaxın vaxtlarda gətirilməlidir.