ABŞ-ın Birləşmiş Millətlər Təşkilatındakı səfiri Linda
Tomas-Qrinfild çərşənbə axşamı Kyivdə Ukrayna prezidenti ilə
görüşərək,
Vaşinqtonun elektrik enerjisinin kəsilməsi, su çatışmazlığı və
Rusiya tərəfindən atəşə tutulması ilə üzləşən ölkəyə “sarsılmaz”
dəstəyini ifadə edib.
Səfir Tomas-Qrinfild və Prezident Volodimir Zelenski Rusiyanın
Ukraynaya bundan səkkiz ay əvvəl başladığı müdaxilədən sonra
törətdiyi vəhşiliklərə görə məsuliyyətə cəlb edilməsini, eləcə də
müharibənin qlobal ərzaq təhlükəsizliyinə təsirini müzakirə
ediblər.
"O, Ukraynanın suverenliyinə beynəlxalq dəstəyi
gücləndirmək və üzv ölkələri beynəlxalq hüququ və BMT Nizamnaməsini
müdafiə etməyə çağırmaq üçün Birləşmiş Millətlər Təşkilatında
fəaliyyətini davam etdirmək işinə sadiqdir" - deyə,
nümayəndəliyin sözçüsü Neyt Evans bildirib.
Birləşmiş Millətlər Təşkilatı və Türkiyə tərəfindən razılaşdırılan,
Ukraynaya taxıl ixracına kömək edən və Rusiyaya ərzaq və gübrə
ixracı qarşısındakı maneələri aradan qaldırmağa kömək edən Qara
Dəniz Taxıl Təşəbbüsünün müddəti noyabrın 19-da başa çatır.
Bu təşəbbüs buğda və digər malların beynəlxalq qiymətlərinin aşağı
salınmasına yardım etmək və Rusiya tərəfindən Ukrayna limanlarında
blokadaya alınmış taxıl və heyvan yemini təyinat yerlərinə
çatdırmaq üçün çox vacibdir. Lakin Moskvanın sazişdən kifayət qədər
faydalanmadığını bəyan edərək, narazılığını bildirməsi Rusiyanın
təşəbbüsün yenilənməsinə etiraz edə biləcəyi ilə bağlı
narahatlıqların artmasına səbəb olub.
Tomas-Qrinfild Ukraynada həmçinin qəddar cinayətlərdən sonra sağ
qalanlar və onların ailələri ilə görüşüb. Kyivdə Milli Polis
Məhkəmə Ekspertizası Laboratoriyasına səfəri zamanı ona müharibə
cinayətlərinin sübutlarının necə toplaması və təhlil etməsi ilə
bağlı məlumat verilib. Ona habelə döyüş meydanında Rusiyanın
törətdiyi cinayətlərin araşdırılması üçün polis tərəfindən toplanan
döyüş sursatı, silahlar və digər əşyalar göstərilib.