Qardabanili idmançı 2023-cü ildə keçiriləcək III Avropa Oyunlarına lisenziya qazanıb (VİDEO)
14:51 / 15.11.2022
Gürcüstan Tai-boksinq, Kikboksinq Milli Federasiyasının idmançıları
11-20 noyabr tarixlərində Türkiyənin Antalya şəhərində böyüklər
arasında keçirilən “Wako kikboksinq” üzrə Avropa çempionatında
iştirak edirlər.
Gürcüstan idmançıları çempionatın ilk mərhələsində rəqiblərini
məğlub edərək, növbəti mərhələyə keçiblər. “Gürcüstan Azərbaycanlı
İdmançılar Birliyi”-nin sədri Tofiq Əkbərov “Marneuli” radiosu ilə
söhbəti zamanı bildirdi ki, növbəti mərhələyə üç Gürcüstan
idmançısı keçə bilib.
“Növbəti mərhələyə keçən idmançılar 63 kq çəki
dərəcəsində Emil Xəlilov, 75 kq çəki dərəcəsində Luka Şonia və 86
kq çəki dərəcsində isə Zurab İvaniadzedir. Həmin idmançılar 2023-cü
ildə Polşanın Krakov şəhərində keçiriləcək “III Avropa Oyunları”
yarışına lisenziya qazandılar. Bu yarışdan sonra əsas hədəf 2024-cü
ildə Fransada keçiriləcək Yay Olimpiya oyunlarıdır”,
– Tofiq Əkbərov dedi.
Əkbərov sevinir ki, Gürcüstan tarixində ilk dəfə bir azərbaycanlı
kikboksinq üzrə Avropa Oyunlarında iştirak etmək hüququ
qazandı.
“Biz ona görə, çox sevinirik ki, bölgəmizin idmançıları
gələn il Avropada keçiriləcək “III Avropa Oyunları”na lisenziya
qazandılar. Əsas da Emil Xəlilovun qələbəsidir. Emil Xəlilov
çempionatın ilk mərhələsində Slovakiyalı rəqibini məğlub edərək,
növbəti mərhələyə keçdi. Onun bu yarışda qələbə qazanması böyük bir
hissdir və Gürcüstanda yaşayan Azərbaycanlılar bununla fəxr edə
bilərlər. İnşallah inanırıq ki, Emil Xəlilov bu və gələcək yarışda
da ümidləri doğruladacaq. Bu münasibətlə hər kəsi təbrik
edirəm”, – Tofiq Əkbərov bildirdi.
Emil Xəlilov Qardabanidə fəaliyyət göstərən “Qaracalar” idman
klubunun idmançısıdır. Onun baş məşqçisi isə İsfahan Əliyevdir.
Emil Xəlilov bir sıra ölkə və xarici ölkələrdə yarışlarda iştirak
edib və uğurlar qazanıb.
Əkbərov onu da əlavə etdi ki, kikboksinq 1978-ci ildə yaradılmasına
baxmayaraq, tarixdə ilk dəfə olaraq olimpiya oyunlarına salınıb.
Onun sözlərinə görə, olimpiya oyunları 4 ildən bir keçirilir və
həmin yarışda on minlərlə idmançı iştirak edir.
Xatırladaq ki, tarixdə ilk Avropa Oyunları 2015-ci il iyunun
12-28-də Bakıda təşkil olunub. II Avropa Oyunları isə 21-30 iyunda
Belarusun paytaxtı Minskdə keçirilib.