İctimai müdafiəçi Nino Lomcariyanın sözlərinə görə, Gürcüstanın
üçüncü prezidenti Mixeil Saakaşvilinin səhhətinin ötən illə
müqayisədə pisləşdiyi görünür.
O, bu barədə bu gün, noyabrın 28-də Mixeil Saakaşviliyə baş
çəkdikdən sonra məlumat verib.
Onun sözlərinə görə, Saakaşvili kəskin şəkildə arıqlayıb və uzun
müddət danışmağa çətinlik çəkir.
“Mən Mixeil Saakaşvili ilə təxminən 10 dəqiqə danışdım,
çünki başa düşürəm ki, onun üçün daha çox danışmaq çətindir. Mən
həkim deyiləm, amma keçən yanvar ayında Qori Xəstəxanasında olarkən
necə göründüyünü xatırlayıram və vizual olaraq fərq çox
təəccüblüdür. Vizual olaraq onun səhhətinin kəskin şəkildə
pisləşdiyi, arıqladığı görünür”, - Nino Lomcaria
bildirib.
Bu gün, noyabrın 28-də Tbilisi Şəhər Məhkəməsində Mixeil
Saakaşvilinin sərhədi keçmək işi üzrə məhkəməsi keçirilməlidir.
Saakaşvilinin vəkillərinin dediyinə görə, keçmiş prezident məhkəmə
iclasında iştirak etmək istəyir. Lakin VMH-ın rəhbərlərindən olan
Xatia Dekanoidzenin sözlərinə görə, Saakaşvilinin səhhətinə görə
onu məhkəməyə gətirmək mümkün deyil.