Gürcüstan parlamentinin üzvü Rati İonatamişvili Ukrayna Prezident Ofisi rəhbərinin müşaviri Mixail Podolyakın Gürcüstanın eks-prezidenti Mixail Saakaşvili haqqında bəyanatını Gürcüstanın ədalət mühakiməsinə müdaxilə adlandırıb.

"Bu, bir az utancverici bəyanat oldu - "mən gəlib həbsdə olan Saakaşvilini öz əllərimlə götürəcəm". Mən bunu ciddi qəbul edə bilmirəm", - İonatamişvili bildirib.

Qeyd olunur ki, bu, gürcü ədalət mühakiməsinə müdaxilə cəhdidir, çünki belə bir qərar məhkəmə tərəfindən müstəqil və obyektiv hallar nəzərə alınmaqla qəbul edilir və bu qərarın qəbuluna heç kim müdaxilə edə bilməz.

Xatırladaq ki, Mixail Podolyak mediaya müsahibəsində Ukrayna hakimiyyətinin Gürcüstan hökumətinə eks-prezident Saakaşvilini müalicə üçün Kiyevə köçürməyi rəsmən təklif etdiyini bildirib. O deyib ki, Tiflis onu birbaşa Ukraynaya köçürmək istəmirsə, o zaman istənilən üçüncü Avropa ölkəsinə verilə bilər. Podolyak isə Saakaşvili üçün şəxsən gəlməyə hazır olduğunu vurğulayıb.