Nika Melia, Levan Xabeişvili, Qiorqi Mumladze və Nona Mamulaşvili – bu VMH-ın sədr seçkilərində iştirak edən namizədlərin siyahısıdır. VMH-ın Marneuli Rayon Təşkilatının sədri Laşa Kveladze “Marneuli” radiosu ilə söhbəti zamanı bildirdi ki, onların təşkilatının əksəriyyəti Qiorqi Mumladze ilə bağlı müsbət fikirdədir.

“Seçim azadlığıdır və hamının fikrinə hörmətlə yanaşırıq. Ancaq təşkilatda əksəriyyət Qiorqi Mumladzeni bəyənir. VMH həmişə fikir plüralizminə əsaslanırdı və daxili rəqabətə hörmətlə yanaşırdı. Ona görə də partiya mütləq bu prosesdən güclü olaraq çıxacaq”, – Laşa Kveladze bildirdi.

Göründüyü kimi, Vahid Milli Hərəkatın ofisində ümumi namizədlə bağlı razılaşmayıblar. Marneuli Bələdiyyə Məclisinin Vahid Milli Hərəkatdan olan üzvü Nərgiz Əliyeva partiya sədrliyinə namizədlərlə bağlı fərqli fikirdədir. O, seçkilərdə Levan Xabeişvilini dəstəklədiyini bildirir.

“Bir regionun eyni namizədi seçməsi mütləq deyil. Bu müxtəlif də ola bilər. İnsanlar partiyada uğurla işləyəcək namizədi seçirlər. Bu şəxsi seçimdir və heç kimin buna nə isə demək hüququ yoxdur. Mən Levan Xabeişvilini dəstəkləyirəm. Xabeişvilinin Marneulidə minlərlə dəstəkçisi var. Yalnız mən deyiləm. Eləcə də Nika Melia, Buğadze və.s. Marneulidə hər namizədin öz seçicisi var. Mən tək deyiləm, bizim komandamız var, yaxın günlərdə onları görəcəksiniz. Heç bir ziddiyyət yoxdur, sağlam rəqabətdir. Qiorqi Mumladze ilə də yaxşı münasibətimiz var. Biz, VMH-ın üzvləri olaraq kim seçiləcəksə, onunla da işləyəcəyik. Saxta qarşıdurmalar yaratmaq istəyənlər var. Əsas məqsədimiz odur ki, VMH inkişaf etsin. Mübarizə yolumuz daha intensiv olsun. Əsas məqsəd, əlbəttə, Mixeil Saakaşvilinin azadlığıdır. Bu istiqamətdə yeni namizədin strategiyası mühümdür. Hansı addımlar atılacaq, kim seçiləcək, bunlara baxmayaraq biz VMH-ın inkişafını istəyirik”, – Əliyeva bildirdi.

Vahid Milli Hərəkatın sədr seçkilərinin qeydiyyatına artıq başlanılıb və 26 yanvar saat 10:00-a kimi davam edəcək.

Partiyanın məlumatına görə, qeydiyyat, eləcə də səs vermə elektron qaydada, unikal texnoloji platforma “Blokçeyn” sistemi vasitəsilə həyata keçiriləcək.

Vahid Milli Hərəkatın sədr seçkilərində səs vermə 28 yanvar saat 10:00-da başlayacaq və 30 yanvar saat 10:00-da başa çatacaq.