Bu gün, 23 fevral tarixində Marneulidə Mixeil Saakaşviliyə dəstək
aksiyası keçirilib.
Aksiya iştirakçıları Marneulidə “Vahid Milli Hərəkatın” rayon
ofisinin qarşısına toplaşaraq meriyaya doğru hərəkət ediblər.
“Bütün rayonlarda Mişaya dəstək aksiyaları keçirilir.
Bu Mixeil Saakaşvilini xilas etməmizə və rus rejiminə təslim
etməməmizə xidmət göstərir. Ona görə bu gün Marneulidə aksiya
keçirilir və başqa rayonlarda da keçiriləcək. Yekun nəticədə, bu
etiraz rus rejimini bitirəcəyimizə səbəb olacaq. Bu rejim
Gürcüstanı dağıtdı və məhv olma yoluna sürüklədi”, –
VMH-nın üzvü Qiorqi Mumladze bildirdi.
Marneuli meriyası qarşısına toplaşmış aksiya içtirakçıları çıxış
ediblər və Gürcüstanın üçüncü prezidenti Mixeil Saakaşvilinin azad
edilməsini tələb ediblər. Aksiyada “Vahid Milli Hərəkatın” üzvləri
və Marneuli, Qardabani, Bolnisidən dəstəkçilər iştirak
edirdilər.
Aksiyada “Vahid Milli Hərəkatın” sədri Levan Xabeişvili də iştirak
edirdi.
“Avropa İttifaqı qətnamə yazıb və orada ağ və qara
şəkildə Gürcüstanın xəyanəti haqqında qeyd olunub. Bunların
hamısını siz yaxşı bilirsiniz. Xəyanət haqqında yazılıb ki, rus
oliqarxı Bidzina İvanişvili bizim ölkə üçün Avropa və Gürcüstan
arasında maneədir. Nə qədər cəhd göstərsən də, artıq tarix yazılıb
və hamı, eləcə də bu gün rejimi dəstəkləyən vəzifəli şəxslər tarixə
xəyanət etmiş rejimin dəstəkçiləri, iştirakçıları kimi daxil
olacağınızı hiss etməlisiniz. Siz bu məsuliyyətdən qaça
bilməzsiniz. Biz çox sakit, dinc şəkildə etiraz edirik. Bütün
şəhərlərə, regionlara gedirik, bütün kəndlərə, ailələrə gedəcəyik,
soydaşlarımızla söhbət edəcəyik və onlara bu mübarizənin həlledici,
bizim ölkəyə lazım olduğunu izah edəcəyik”, – Levan
Xabeişvili bildirdi.
Aksiya iştirakçıları Türkiyədə zəlzələ nəticəsində həlak olanları
da sükutla yad ediblər. Aksiyanın sonunda isə Gürcüstan himni
səsləndirilib.