Kəndlərdə skrininq – qadınlar üçün ikinci həyat şansı
00:00 / 07.07.2023
"Qadınların reproduktiv sağlamlığı və hüquqlarının
müdafiəsi" – Vətəndaş Bərabərliyi Platforması təşkilatının
Bolnisi bələdiyyəsində kəndlərdə yaşayan 400 qadına tam təmənnasız
skrininqdən keçmək şəraiti yaradan layihəsi belə adlanır.
6 ay ərzində 8 qadına süd vəzisi və uşaqlıq boynu xərçəngi diaqnozu
qoyulub.
Bolnisi televiziyasının jurnalisti, 47 yaşlı Lika Enukidze tibb
müəssisəsinə skrininqi işıqlandırmaq üçün gedib. O, bildirir ki,
çəkilişlə yanaşı müayinədən də keçməyə qərar verib.
“Bolnisi şəhərində iki dəfə pulsuz skirininq keçirildi
və mən jurnalist kimi işıqlandırmağa dəvət olunmuşdum.
Çəkilişlərdən birində Samirədən (layihənin rəhbəri) xahiş etdim ki,
mən də skrininqdən keçim. Bu yolla məndə bədxassəli şiş olduğunu
öyrəndim. Bütün qadınlara demək istəyirəm ki, mütləq skrininq
etsinlər. Bu xəstəlik tam təsadüfən aşkar olana qədər heç bir
simptomum yox idi. Samirə və bu layihə olmasa, ikinci həyat şansım
olmayacaqdı. Bütün qadınlara demək istəyirəm ki, mütləq skrininq
etsinlər”, – Lika Enukidze bildirir.
Lika kimi, skrininq zamanı Muğanlı (Farizi) kənd sakini Emzarə
Cəfərovanın 58 yaşlı anasının da onkoloji xəstəliyinin olduğu
aşkarlanıb.
“Pulsuz skrininq proqram olmasa, yəqin anam öz
xəstəliyi haqqında vaxtında məlumat ala bilməyəcəkdi və heç müalicə
də olunmayacaqdı. Anam 58 yaşındadır və indi daimi mübarizə
qarşısındayıq. Dil baryerinə görə çox şeylər əlçatan deyil.
Minnətdaram ki, bu proqram vaxtında yarandı. Belə xidmətlər kənd
sakinləri üçün əlçatan olmalıdır”, – Emzarə Cəfərova
deyir.
Bolnisi sakini Təranə İsgəndərova kəndlərdə qadınların
məlumatlandırılması üçün “Vətəndaş Bərabərliyi Platformasına” kömək
edənlərdən biridir. O, yerli icmada reproduktiv sağlamlıq haqqında
məlumatlandırma səviyyəsinin artırılmasına çalışır. Təranə qeyd
edir ki, ona layihədə iştirak etmək təklif edildiyində sevinclə
razılaşıb, çünki icmanın problemlərini yaxşı bilir: “Bir neçə ay əvvəl dedilər ki, bir qadın mənimlə
görüşmək istəyir. Həmin adam qadınları pulsuz müalicə etmək
istəyir. Böyük məmnuniyyətlə bu təşəbbüslə razılaşdım. Razılaşdıq
və 15 qadına layihədə iştirak etməyi təklif etdim. Bolnisi
xəstəxanasına getdik və pulsuz tibbi xidmətlərdən yararlandıq. 15
qadından birində xərçəng aşkarlandı. O, bu barədə heç nə
bilmirdi”,– Təranə İsgəndərova deyir.
“Vətəndaş Bərabərliyi Platformasına” Samirə İsmayılova rəhbərlik
edir. Onun sözlərinə görə, əsas benefisiarlar kənddə yaşayan etnik
azlıq nümayəndəsi olan qadınlar və gənclər, əlavə müxtəlif növ
baryerləri olan şəxslərdir.
“Bizim layihə – qadınların reproduktiv sağlamlığına
dəstək və hüquqlarının müdafiəsi layihəsi sayəsində 8 qadını xilas
edə bildik. Buradan 4 xəstədə döş xərçəngi aşkarlandı, qalanlarında
isə uşaqlıq boynu xərçənginin müxtəlif patalogiyaları var idi.
Təəssüf ki, çox sayda məlumatsız qadınla qarşılaşdıq. 6 aylıq
fəaliyyətimiz nəticəsində 40-a yaxın görüş keçirdik. Qadınlarla
birbaşa görüşürdük. Ümumilikdə 1500 qadınla görüşdük və buradan 400
qadın bizim layihə çərçivəsində sona qədər xidmətdən yararlana
bildi”, – Samirə bildirdi.
Vətəndaş Bərabərliyi Platforması indi reproduktiv sağlamlıq
istiqamətində Marneuli, Bolnisi və Dmanisidə yerli özünüidarələr
səviyyəsində mexanizmlər tətbiq etsinlər. Bunun üçün təşviqat
kampaniyasına başlayıblar. İsmayılova ümid edir ki, kampaniyanı
uğurla həyata keçirəcəklər.
“Layihəni davam etdirmək istəyirik və mövcud mexanizmi
yerli özünüidarə səviyyəsində tətbiq etmək istəyirik ki, bələdiyyə
səviyyəsində mexanizmlər nəzərə alınsın. Bu mexanizmlər Bolnisi,
Dmanisi və Marneuli bələdiyyəsində kəndlərdə yaşayan, etnik azlıq
nümayəndəsi olan, xidmətlərə əlçatanlığı çox aşağı olan, həssas
qadınlara dəstək olacaq”, – təşkilat rəhbəri
bildirir. BMT-nin
Əhali Fondunun Gürcüstan ofisinin rəhbəri Lela Bakradze
bildirir ki, Gürcüstanda reproduktiv sağlamlığın qorunması
istiqamətində bir neçə pulsuz proqram var. Ancaq bu günə qədər
əhalinin məlumatsız olması ciddi problem olaraq qalmaqdadır.
Bakradzenin sözlərinə görə, baxmayaraq ki, bədxassəli xərçəngin
skrininq proqramı BMT-nin Əhali Fondunun texniki yardımı ilə
Gürcüstanda hələ 2009-cu ildən qüvvədədir, xidmətdən yararlanma
göstəricisi aşağıdır.
Skrininq proqramların effektiv olması və xərçəngdən yaranmış ölüm
halları, xəstəliklərin azalması üçün əhalinin minimum 70%
müayinədən keçməlidir. Ancaq Gürcüstanda son göstəricilərə görə,
xərçəng ilə bağlı bir ilə olan faiz göstəricisi təxminən 14%,
uşaqlıq boynu xərçəngi ilə bağlı isə 12%-dir.
“Bu proqramların əhaliyə yaxınlaşdırılması və
qadınların bu xidmət haqqında daha çox məlumat alması üçün hələ
görüləsi çox iş var. Ən əsası odur ki, bundan yararlansınlar.
Gürcüstanda dövlət proqramı ilə dörd nahiyədə xərçəngin skrininqi
əlçatandır. Uşaqlıq, süd vəzisi, yoğun bağırsaq və kişilər üçün
prostat xərçənginin menecmenti və bu tam təmənnasızdır. Amma
görünür, hələ də əhali bu xidmətlərin olduğunu bilmir və ya coğrafi
əlçatanlıq onlar üçün yenidən problemdir. Ola bilsin, bu xidmətlər
onların evinə yaxın deyil, uzaqda olsun. Məsələn, əgər Bolnisi
ətrafında hansısa kənddə yaşayırlarsa, onlar xidmətdən yararlanmaq
üçün Bolnisiyə gəlməli olacaqlar. Bu əlbəttə baryerdir. Erkən
diaqnostika çox mühümdür. Xərçəngin idarə edilməsində ən mühüm iki
məqam var: Bunlardan biri qarşısı alına bilən lokallaşdırılmış
xərçənglərin qarşısını almaqdır. Məsələn, uşaqlıq boynu xərçəngi
belədir və bunu skrininqin, peyvəndin vasitəsi ilə tam aradan
qaldırmaq mümkündür; İkincisi erkən diaqnozdur, bu döş xərçəngi
halında müalicənin müsbət nəticəsini yüksək dərəcədə
artırır”, – Lela Bakradze bildirib.
Lela Bakradzenin sözlərinə görə, qadınların reproduktiv
sağlamlığına kənd həkimləri mühüm dərəcədə təsir göstərə
bilərlər:
“Bütün araşdırmalar göstərir ki, kənddə yaşayan
qadınlar bu baxımdan daha həssasdırlar. Etnik azlıq nümayəndəsi
olan qadınların da dil bilmədiklərinə görə kifayət qədər mühüm
baryeri var. Əlbəttə, bu xidmətlərə əlçatanlığı azaldır. Bu
baxımdan istəyirəm ki, kənd həkimlərinin rolunu diqqətə yetirim. Bu
bəndin gücləndirilməsi bütün əhalinin məlumatlandırılmasına təsir
göstərə bilər. Kiçik misal deyəcəyəm, kovid dövründə rəqəmsal və
onlayn xidmətinin səhiyyə sahəsində nə dərəcədə potensialının
olduğu yaxşı hiss olundu. Buradan irəli gələrək, Avropa İttifaqının
dəstəyi ilə biz Gürcüstanda rəqəmsal tibbin inkişafı üzərində
işləməyə başladıq. Proqramın nəticələrindən danışmaq tezdir, amma
tətbiq olunacaq xidmətlərdən biri budur ki, kənd həkimləri öz
məntəqə sakinlərini skrininq proqramına birbaşa yaza biləcəklər.
Kənddə yaşayan qadınlar ambulatoriya həkiminin yardımı ilə onlayn
şəkildə özlərinə uyğun vaxt seçə biləcəklər.”
2021-ci ili əhatə edən son statistikaya görə, Gürcüstanda
qadınlarda ən çox süd vəzisi xərçəngi yayılıb. Uşaqlıq boynu
xərçəngi isə beş ən çox yayılmış xəstəlik arasındadır.
“2015-ci illə müqayisə etsək, 2021-ci ildə yeni
halların sayı azalıb. Bu yaxşı dinamika göstəricisidir. Skrininq
proqramlar, xüsusilə uşaqlıq boynu xərçənginin skrininqi və
peyvənd, göstəriciləri daha çox azaltmağa imkan yaradacaq.
Skrininqi və peyvəndi tətbiq edən ölkələr faktiki olaraq yeni
halları sıfıra endiriblər. Uşaqlıq boynu xərçəngi faktiki olaraq bu
ölkələrdə yoxdur”, – BMT-nin Əhali Fondunun Gürcüstan
ofisinin rəhbəri bildirir və qeyd edir ki, Gürcüstanın bu kimi
risklərin qarşısını almaq potensialı, həqiqətən, var. Ən çox lazım
olan yeganə şey məlumatlı olmaqdır və dövlət mütləq bunun qayğısına
qalmalıdır.
Uşaqlıq boynu xərçəngini yaradan səbəb papiloma virusudur. Bu virus
kifayət qədər asan, hər növ cinsi əlaqə vasitəsi ilə yayılır.
Papiloma virusunun 100-dən artıq tipi tanınır. Ancaq onların hamısı
xərçəng riski yaratmır. Xəstəliyin qarşısını almağın ən yaxşı yolu
diaqnostika ilə yanaşı peyvənd olmaqdır. Peyvənd insan orqanizmini
papiloma virusunun xərçəngi yaradacaq tiplərindən qoruyur.
Peyvənd üçün qız və oğlanlarda ən yaxşı yaş 10-14 yaş hesab
olunur.
2019-cu ildən papiloma virusu peyvəndi Gürcüstanın Milli Peyvənd Proqramın daxil
edilib. Əgər ona qədər peyvənd yalnız 10-12 yaşlı qızlar üçün
pulsuz idisə, 2022-ci ildə bu 18 yaşa qədər artdı. 2023-cü ildə isə
hökumətin qərarı ilə yuxarı yaş həddi 26 yaşa qədər artırıldı.