Marneuli şəhəri Kostava küçəsində yol-nəqliyyat hadisəsi
nəticəsində gənc qızın dünyasını dəyişməsindən 50 gün ötüb. Kostava
küçəsində yeniyetmə qızın dünyasını dəyişdiyi hissədə hələ də
tramplin quraşdırılmayıb.
17 yaşlı qızın ölümünə səbəb olan yol-nəqliyyat hadisəsi 23 noyabr
tarixində baş vermişdi. “Marneuli” radiosu olaraq 25 noyabrda
Marneuli yerli özünüidarəsindən həmin ərazidə öz təşəbbüsləri ilə
tramplin quraşdırmağı və ya hansısa formada yolun həmin hissəsində
təhlükəsizliyi təmin etməyi planlaşdırıb-planlaşdırmadıqlarını
soruşduq.
Meriyanın Mətbuat Xidmətindən bizə bildirdilər ki, Merab Kostava
küçəsi Avtomobil Yolları Departamentinə məxsusdur. Sakinlər
tramplinin yerləşdirilməsi üçün yerli meriyaya müraciət
etməlidirlər, bundan sonra, bələdiyyə onlarla Yol Departamenti
arasında vasitəçilik edə bilər.
Bu gün, 12 yanvar tarixində Avtomobil Yolları Departamentindən
“Marneuli” radiosuna bildirdilər ki, departamentdə Marneuli
meriyasının adından göndərilmiş məktub mövcud deyil. Ancaq onların
bildirdiyinə görə, ola bilsin meriya departamentə ərizə ilə
müraciət edib, amma sistemdə axtarış etmək üçün meriyanın
məktubunun nömrəsi lazımdır.
Marneuli meriyasından “Marneuli” radiosuna bildirdilər ki,
vətəndaşlar Kostava küçəsində tramplinin quraşdırılması tələbi ilə
onlara müraciət etməyiblər. Meriyanın İctimaiyyətlə Əlaqələr
Şöbəsindən bildirdilər ki, yerli özünüidarənin öz təşəbbüsü ilə
Avtomobil Yolları Departamentinə yol nişanları, sürəti tənzimləyən
chizaların quraşdırılması üçün müraciət etmək təcrübəsi yoxdur.
Meriyadan bildirirlər ki, əgər yerli sakinlər Kostava küçəsində
tramplinin quraşdırılmasını istəyirlərsə, meriyaya məktubla
müraciət etməlidirlər.
Vətəndaşların Marneuli meriyasına ərizə ilə müraciət
edib-etməməsinə baxmayaraq, fakt göz qabağındadır – Kostava
küçəsində, 17 yaşlı qızın ölümündən 50 gün ötməsindən sonra da
tramplin quraşdırılmayıb.
Həmin yol beynəlxalq əhəmiyyətlidir və buradan gün ərzində yüzlərlə
yük, minik maşını hərəkət edir. Yerli sakinlər bildirirlər ki,
maşınlar yüksək sürətlə hərəkət edirlər və tez-tez qəzalar baş
verir. Yola quraşdırılmış yeganə tramplin isə tez zamanda sıradan
çıxıb. Yolun qəza baş vermiş hissəsində kollec, məktəb və yaşayış
evləri yerləşir.