Marneuli mərkəzi stadionunun 8 il əvvəl başlanılmış tikintisi bu il
başa çatacaq
Marneuli bələdiyyəsinin mərkəzi stadionunun tikinti işləri 8 il
əvvəl başlayıb.
Marneuli meriyası şəhərin mərkəzi stadionunun tikinti işlərinin
vacib smeta sənədlərini hələ 2016-cı ildə almışdı.
Marneulidə UEFA II kateqoriyasına uyğun, 2000 tamaşaçı üçün nəzərdə
tutulmuş futbol meydançasının tikintisi hələ də davam edir.
Marneuli meriyası və Bələdiyyə Məclisi nümayəndələri, Kvemo Kartli
quberantoru, Gürcüstan Futbol Federasiyasının nümayəndələri tikinti
işlərini nəzərdən keçiriblər.
“Tikinti prosesini Marneuli meri Kənan Ömərov, Kvemo
Kartli qubernatoru Qiorqi Doxturişvili, Parlamentin Marneuli və
Qardabani seçki dairəsindən seçilmiş majoritar deputatı Zaur
Darğallı, Marneuli Bələdiyyə Məclisinin sədri Amiran Qiorqadze və
Gürcüstan Bələdiyyələrin İnkişafı Fondunun icraçı direktorunun
birinci müavini Qiorqi Tsibadze nəzərdən keçirib.
Layihə çərçivəsində beynəlxalq standartlara uyğun futbol meydanı və
2000 tamaşaçı üçün nəzərdə tutulmuş tribuna inşa ediləcək. Stadion
kompleksində geyim dəyişmək üçün yer qurulacaq, işıqlandırma
quraşdırılacaq və səsləndirmə sistemi ilə təchiz ediləcək. Stadion
fiziki imkanları məhdud şəxslər üçün adaptasiya edilmiş
olacaq”, – Marneuli meriyasının məlumatında qeyd
olunub.
Marneuli mərkəzi stadionunun tikintisini Gürcüstan hökuməti
maliyyələşdirir. Layihəni Regional İnkişaf və İnfrastruktur
Nazirliyi həyata keçirir və dəyəri 8 100 000 laridir.
Qeyd etmək lazımdır ki, Marneuli bələdiyyəsi stadion üçün smeta
sənədlərini hələ 2016-cı ildən tərtib etmişdi. Bunun üçün 150 000
lari xərclənib, amma qeyd olunan sənədlər yenilənməlidir. Çünki
2017-ci ildən Gürcüstan hökuməti tərəfindən tətbiq edilmiş
“Bina-tikililərin təhlükəsizlik qaydalarının” yeni texniki
reqlamenti qüvvəyə minib. 2019-cu ildə layihə-hesabat sənədlərində
dəyişiklik edilib və bundan sonra işlər üçün ilk tender elan
olunub. Həmin tender məhz dəyişdirilmiş/düzəldilmiş smeta
sənədlərinə görə, baş tutmayıb.