Bu gün, 4 aprel tarixində Marneuli Bələdiyyə Məclisinin iclası keçirilib. İclasda 8 məsələ müzakirəyə çıxarılıb.

Bələdiyyə Məclisinin üzvləri bütün məsələləri dəstəkləyib.

“Bu gün müzakirə olunan işlərin siyahısında Marneuli bələdiyyəsinin bu ilki büdcəsində ediləcək dəyişikliklər layihəsi də var idi. Həmçinin, Gürcüstanın Regional Fondundan maliyyələşdiriləcək layihələrin bəyənilməsi, kəndə dəstək proqramı çərçivəsində həyata keçiriləcək iki layihənin bəyənilməsi də yer alırdı. Eləcə də tikintilər planının bəyənilməsi və meriyada ştat dəyişiklikləri məsələsi də var idi. İnzibati xidmətin rəhbərinin açıqlamasına görə, mədəniyyət xidmətinə bir ştat əlavə olunur. Bu Marneuli Bələdiyyə Məclisinin müzakirə etdiyi və səs çoxluğu ilə müsbət qərar qəbul etdiyi məsələlərdir”, – Marneuli Bələdiyyə Məclisinin İnzibati Xidmətinin rəhbəri Nino Beridze bildirdi.

Bələdiyyə Məclisinin bu gün baş tutan iclasında deputatlar Gürcüstanın regionlarında həyata keçiriləcək layihələr fondundan Marneuli bələdiyyəsində maliyyələşdiriləcək layihələri bəyəniblər.

“Bunlar Marneuli bələdiyyəsinin Dioqnisi kəndində daxili yollara asfalt qatının çəkilməsi, Marneuli bələdiyyəsinin Xocorni kəndində daxili yolların bərpası, Ağkörpü kəndində daxili yolların bərpası, Kürtlər, Lejbəddin kəndlərində daxili yollara asfalt qatının çəkilməsidir. Xahiş edirik, dəstəkləyəsiniz ki, sonradan bu layihələri həyata keçirək”, – məsələni təqdim edən Adil Əliyev bildirib.

Bələdiyyə Məclisinin üzvü Adil Əliyev digər məsələ ilə bağlı da danışıb. Bu kəndə dəstək proqramı çərçivəsində iki kənddə seçilmiş layihələrin dəyişdirilməsi ilə bağlı idi.

“Məktubla 2023-cü il kəndə dəstək proqramı çərçivəsində iki layihənin dəyişdirilməsini və bəyənilməsini tələb edirlər. Bu Böyük Bəylər kəndində suvarma kanalının üzərində keçid körpüsü əvəzinə yola çınqıl tökülməsi, Verxviani kəndində su sistemi əvəzinə yola çınqıl tökülməsidir. Xahiş edirik, dəstək göstərəsiniz, bəyənəsiniz. Əhali özü bunu istədi, onların ötən il başqa istəyi var idi və indi dəyişdirməyi tələb edirlər. Daxili yollara çınqıl tökülməsi, eləcə də suvarma sisteminin tikintisi əvəzinə yola çınqıl tökülməsini tələb edirlər”, – Adil Əliyev bildirdi.

Bələdiyyə Məclisinin 4 aprel tarixində baş tutan iclasında deputatlar Marneuli meriyasının Təhsil, Mədəniyyət, İdman və Gənclərlə İş Şöbəsinin ştat siyahısının artırılmasını, həmin şöbəyə müqavilə ilə götürülmüş əməkdaşın sayının artırılmasını dəstəkləyiblər.