Marneulidə Mağalaşvili Körpüsünün bağlanması şəhərdə tıxac yaradıb və nəqliyyatın hərəkətinə mane olub. Əhali bildirir ki, 30 noyabr tarixində, axşam saatlarla tıxacda qalmalı olublar.

“Axşam saat 5-də işdən çıxdım və saat 8-də evə çatdım, dəhşətdir. Əhali avtobusdan düşdü və piyada bazar tərəfə getdi. Dəhşətli vəziyyətdir. Avtobusun sürücüsü dedi ki, saatlarla tıxacda durmalı olur və daha reys etməyəcək.

Hamının taksi pulu yoxdur ki, taksi ilə hərəkət etsin”, – sərnişinlərdən biri bildirir.

“Bilmirəm, körpünün o tərəfində işləyənlər Marneulidən ayrı düşmüşük. Axşam tıxac idi və dediklərinə görə, 20 gün buna dözməliyik. Bilmirəm işə nə zaman çatacağam və ya işdən evə necə gedəcəyəm. Patrul da hərəkəti tənzimləmir”, – sərnişinlərdən biri qeyd edir.

Marneulinin nəqliyyat şirkətləri “Marneuli” radiosu ilə söhbət zamanı bildirirlər ki, onların başqa alternativ yolu yoxdur və sərnişinlərə vəziyyətin düzələcəyinə dair vəd də vermirlər. Marneuli meriyasının balansında olan “Avtopark” MMC nəqliyyat şirkətinin rəhbəri Qiqa Calağonianın sözlərinə əsasən, yaranmış vəziyyətə görə, şəhər avtobuslarının bazar ərazisindən keçməsinə qərar veriblər, digər kənd avtobusları isə yalnız bazara qədər gedə biləcəklər.

“Şəhər avtobusları, Qızılhacılı kənd və Candar məntəqəsinin avtobusları körpüdən keçməklə adi qaydada keçdikləri kimi hərəkət edəcəklər. Qalan kəndlərin avtobusları isə bazara qədər gedə biləcəklər. Tıxaca görə planlaşdırılan sayda reys edə bilmirlər”, – Calağonia bildirib.

Marneulidə avtobuslardan başqa marşrutlar də xidmət göstərirlər. “Ekspress Turist” MMC-nin rəhbəri Yuri Samxaradzenin sözlərinə görə, onların nəqliyyatı bazara qədər dayanmayacaq və köhnə formatda reyslərə davam edəcək. Ancaq yaranmış tıxaca görə vətəndaşlara tam xidmət göstərə bilmilər.

“İndi, misal üçün, hərəkət adi qaydada davam edir. Amma saat 13:00-dan artıq tıxac başlayacaq. Başqa cür işləyə bilmirik. Körpünün altından keçirik və həmişə getdiyimiz xəttlə axıra qədər gedirik”, - Yuri Samxaradze bildirib.

Mağalaşvili körpüsü 30 noyabr tarixindən başlayaraq yenidənqurma işlərinə görə, 20 günlük bağlanıb.

Bu müddət ərzində nəqliyyat vasitələri qeyd olunan alternativ istiqamətlərdə hərəkət edə biləcəklər:

• Noe Jordania küçəsi
• Revaz Lağidze küçəsi
• Merab Kostava küçəsi

Marneuli şəhərində Durmişxan Mağalaşvili adına körpünün bərpa işlərini “İrlani” MMC 1 878 333 lariyə həyata keçirir. İşlər beş Aydan artıqdır aparılır.

Marneuli meriyası şirkətlə 2023-cü ilin 5 may tarixində müqavilə bağlayıb. Müqaviləyə görə, işlərin başa çatdırılması müddəti olaraq 150 gün , təxminən 5 ay müəyyən edilib. Meriya və “İrlani” MMC arasında 5 may tarixində bağlanmış müqavilədə 12 oktyabr tarixində dəyişiklik edilib. Dəyişikliyə əsasən, şirkətə işləri həyata keçirmək üçün 25 dekabra qədər vaxt verilib.