Ermənistan, Azərbaycan və Rusiya liderləri Soçidə keçirilən
üçtərəfli danışıqlardan sonra birgə bəyanatla çıxış ediblər.
Bəyanatın mətnini Kreml yayıb.
Mətnə görə, liderlər 9 noyabr, 11 yanvar 2020-ci il və 26 noyabr
2021-ci il tarixli üçtərəfli bəyanatların icrası prosesi barədə
danışıblar.
“Tərəflər Azərbaycan-Ermənistan münasibətlərinin kompleks şəkildə
normallaşdırılması, Cənubi Qafqazda sülhün, sabitliyin,
təhlükəsizliyin və davamlı iqtisadi inkişafın təmin edilməsi
maraqlarına cavab verən bütün qeyd olunan sazişlərə əməl etməyə
hazır olduqlarını təsdiq edirlər. Tərəflər qalan vəzifələrin, o
cümlədən humanitar məsələlərin təcili həllinə əlavə səylər sərf
etməyə razılaşıblar.
Tərəflər güc tətbiq etməkdən və ya onun tətbiqi ilə hədələməkdən
çəkinməyə, bütün problemli məsələləri yalnız bir-birinin
suverenliyi, ərazi bütövlüyü və sərhədlərinin toxunulmazlığı
əsasında həll etməyə razılaşıblar. Həmçinin regionda davamlı və
uzunmüddətli sülhə nail olmaq üçün Azərbaycan və Ermənistan
arasında sülh sazişinin imzalanmasına fəal hazırlığın vacibliyi
vurğulanıb. Tərəflər qarşılıqlı məqbul həll yolunun axtarışını
davam etdirmək barədə razılığa gəliblər.
Rusiyanın dəstəyi ilə cəmiyyət, ekspert dairələrinin nümayəndələri
və dini liderlər arasında dialoqun davam etdirilməsi üçün
Azərbaycan və Ermənistan arasında müsbət atmosferin yaradılmasının,
həmçinin üçtərəfli parlamentlərarası təmasların başlanmasının
vacibliyi vurğulanıb.
Azərbaycan və Ermənistan liderləri Rusiyanın iki ölkə arasında
münasibətlərin normallaşmasına, Cənubi Qafqazda sabitliyin və
inkişafın təmin edilməsinə kömək etmək üçün gələcəkdə də bütün
tədbirləri davam etdirməyə hazır olduğunu
alqışlayıblar”, - deyə məlumatda bildirilir.