Gürcüstan universitet tələbələrinin bir qismi "rus qanununa" görə
and içib.
Onlar Avropaya hə deyirlər və Gürcüstan hökumətini qanun layihəsini
geri çəkməyə çağırırlar.
Marneulili Tekla Dokvadze beynəlxalq Qara Dəniz Universitetinin
beynəlxalq əlaqələr fakültəsinin tələbəsidir. O, bildirir ki,
aksiyalara Gürcüstanın Avropalı gələcəyi üçün gedir və rusyönümlü
rejimə yox deyir.
“Mən ölkəmin yeri haradadırsa, orada, tarixin doğru
tərəfində, Azadlıq Meydanında dayanıram. Bizim əcdadlarımızın
azadlıq üçün mübarizə apardığı yer. Biz rusyönümlü rejimə qarşı
uzun zaman əvvəl başlanılmış mübarizəni davam etdiririk. Bu rejimin
məğlub olması üçün hamımız birləşməliyik. Biz dinc, təhlükəsiz və
Avropa dövləti olaraq formalaşmağımıza mane olan heç kimi və heç
nəyi istəmirik. Biz Rusiyanı istəmirik!!! Avropaya hə!!! "Rus
qanununa" və Rusiya imperiyasına yox”, - Tekla Dokvadze
bildirir.
Tekla 12 may tarixində, insanların Parlament qarşısında "rus
qanuna" etiraz üçün səhərə qədər oyaq qaldığı aksiyaya da qoşulub.
Daha bir tələbə, Marneulili Tamar Okropiridze aksiyadan yeni
qayıdıb. Tamar Marneulidə qaçqınlıq nəticəsində yaşamalı olub. 7
yaşında olanda, 2008-ci ilin avqust müharibəsi zamanı Didi
Liaxvidən Marneuliyə köçürülüblər. O, bildirir ki, Rusiya ilə bizi
yaxınlaşdıracaq heç nəyi qəbul etməməyinin səbəblərindən biri də
məhz budur.
“Mənim üçün bu qanun "rus qanunudur", ona görə də xüsusilə pis
emosiyalar oyadır. Mənim və çoxsaylı gənclərin mövqeyi aydındır.
Biz Avropa yolunu seçirik və bizi keçmişə qaytaracaq hər şeyə qarşı
çıxırıq. Məhz buna görə qərar verdik ki, Parlament binası
qarşısında səhərə kimi oyaq qalaq və səhər gələn deputatlara bir
daha, artıq üçüncü dəfə öz etirazımızı deyək, göstərək. Bütün gecə
ərzində insanlar bir-biri ilə istiliyi, qidanı bölüşür, oynayır,
oxuyurdular. Ancaq bu axşam səhər öz simasını dəyişdi, çünki hər
tərəfdən xüsusi təyinatlılar, polis səfərbər edilmişdi. Bizi
Parlament binasından uzaqlaşdırmağa başladılar ki, deputatlar
üçüncü iclasa rahat getsinlər. Yekunda, hər şey başa çatdıqdan
sonra polis insanları saxlamağa və bibər spreyindən istifadə etməyə
başladı, 20-yə yaxın adamı səbəbsiz həbs etdilər. Ancaq bizi
dayandıra bilməyəcəklər və mübarizəmizə davam edəcəyik”, –
Tamar dedi.
Tamar Cavaxişvili Universitetinin turizm fakültəsinin tələbəsidir.
Eyni zamanda fotoqraflıqla məşğuldur və onun obyektivinə aksiyanın
çox kadrları düşüb. “Əlbəttə, andiçməyə qoşuluram
və ümid edirəm ki, daha çox mühazirəçi, tələbə bizə qoşulacaq,
çünki biz böyük qüvvəyik”.
Parlament qarşısında "rus qanununa" qarşı aksiya davam edir. Bu
gün, 13 may tarixində Parlamentin Hüquqi Məsələlər üzrə Komitəsində
“Agentlər qanununu” üçüncü oxunuşda 67 saniyəyə qəbul ediblər.
Qanun layihəsini plenar iclasda yekun, üçüncü dinləmə ilə sabah, 14
may tarixində müzakirə edəcəklər.
“Gürcü Arzusu” bir daha “Rusiya qanununu” qəbul etməyi
planlaşdırır. Həmin qanun 2023-cü ilin mart ayında kütləvi
etirazlar nəticəsində geri çəkilmişdi. “Gürcü Arzusu” ötən il vəd
vermişdi ki, “Rusiya qanunu” Parlamentə qaytarmayacaqlar. Amma vədi
pozublar. “Gürcü Arzusu” qanun layihəsinin ilkin formasından yalnız
“agent” sözünü çıxarıb və onu xarici maraqların daşıyıcısı ilə əvəz
edib.
Qanuna görə, gəlirinin 20%-dən artığı xaricdən əldə olunan bütün
QHT və media təşkilatlar xarici qüvvələrin maraq daşıyıcısı hesab
olunurlar. Dövlət bu təşkilatların fəaliyyətini və məqsədlərini
araşdırmayacaq, onların hamısına xarici qüvvələrin maraq daşıyıcısı
adını verəcək.
Qanun sivil ölkələrdə olduğu kimi düşmən əhval-ruhiyyəli ölkələrdən
gələn maliyyəyə deyil, Avropa və Amerikadan gələn maliyyəyə
istiqamətlənib.
Qanunun irəli sürülməsinə görə, Avropa İttifaqı üzvləri və
Gürcüstanın dost ölkə liderləri öz təəccüblərini bildiriblər,
Rusiya Prezidentinin mətbuat katibi isə “Gürcü Arzusu”-nun qanununu
bəyənib.