Yeparxiya və yerli sakinlər arasında başlamış torpaq mübahisəsi ilə bağlı hansı qərar veriləcək – yerli hakimiyyət bir həftəlik vaxt istəyib
17:17 / 24.01.2021
Marneuli bələdiyyəsinin İkinci Kosalı kəndində bir neçə gündür
ki, yerli sakinlər və Yeparxiya arasında kənd təsərrüfatı təyinatlı
torpaqlarla bağlı mübahisə gedir.
Əhali bu gün, 24 yanvar tarixində ruhani şəxslərin torpağı şumlamaq
üçün texnika gətirməsindən sonra həmin yerə toplaşıb. İndiki
mərhələdə işlər dayandırılıb. Marneuli və Hucabinin Yepiskopu
Qiorqi (Camdeliani) bildirib ki, məsələ mütləq danışıqlar masasında
müzakirə olunmalıdır.
“Dövlət çağırış mövqeyində dayanmalıdır. Belə çıxır ki,
monastır rahibləri haradan keçməli olduqlarını əhalidən
soruşmalıdır, yoxsa necə? Bunlar (sakinlər) hüquqlarından kənar
funksiyalara sahiblənirlər. Bu gün sakit şəkildə dağıldıq, siz
sakit evinizə gedin, biz evimizə gedəcəyik. Gözləyək, görək bu
məsələ necə həll olunacaq. Sizin, yaxud mənim istədiyim kimi deyil,
ədalətli şəkildə həll olunmalıdır.”
Marneuli meri səlahiyyətlərini icra edən Laşa Lobcanidze də hadisə
yerinə gəlmişdi. O, toplaşanlardan bir həftəlik vaxt istədi və
bildirdi ki, müvafiq qurumlar artıq məsələni araşdırır.
“Bildiyiniz kimi, burada yerli sakinlərlə yeparxiya
arasında torpaqla bağlı məsələ həll olunmalıdır. Bu məsələyə bütün
müvafiq dövlət strukturları, konkret olaraq meriya, eləcə də
İqtisadiyyat Nazirliyi qoşulub. Bizim onlara cavabımız budur ki,
əmlak sahibi tərəfindən qərar qəbul edilənə qədər bir həftə vaxt
istəyirik. Ona qədər xahiş edirik tərəflər gedib həmin yerdə işlər
aparmaqdan çəkinsinlər və qərarı gözləyək.”
Salam platformasının liderlərindən Kamran Məmmədli hesab edir ki,
dövlət kəndlilərin tələblərini nəzərə almalıdır və məntiqli qərar
qəbul etməlidir.
“Burada əsas məsələ odur ki, neçə gündür əhali və
yeparxiya arasında bu gərginlik davam edir. Real vəziyyət belədir
ki, əhali torpaq istəyir. Gürcüstanda torpaq islahatı olmadığına
görə kəndlini qane edə bilməz. Biz görürük ki, etnik azlıqlarn
məskunlaşdığı regionda, Kvemo Kartlidə konkret şəxslər, yaxud
qruplar rəsmi, ya qeyri-rəsmi şəkildə bu torpaqları istifadə edir.
“Salam” üçün torpaq islahatına qədər hakimiyyətin (meriya,
İqtisadiyyat Nazirliyi) məntiqli addım atması və kənddə kəndlilərin
torpağa ehtiyacı olması prinsipi ilə hərəkət etməsi mühümdür. Hələ
ki, pandemiya dövrüdür və ölkədə iqtisadi böhran
yaşanır.”
Yerli sakinlər və Yeparxiya indi dövlətin qərarını gözləyir. Məhz
onların cavabından sonra İkinci Kosalıda torpaq sahəsinin kimin
istifadəsinə veriləcəyi məlum olacaq.