Bu gün, 18 yanvar tarixində Marneulidə "Lelo" partiyasının yeni
ofisi açılıb. Ofisin açılışında partiyanın rəhbər şəxsləri və yerli
dəstəkçiləri iştirak edirdilər.
“Lelo Gürcüstan Naminə” partiyasının Marneuli ofisinə Aqil
Mustafayev rəhbərlik edəcək. Onun "Marneuli" radiosuna bildirdiyinə
görə, müxalifətin gücləndirilməsi məqsədilə “Lelo”ya üzv olmağa
qərar verib.
"Hamımız bilirik ki, son iki il ərzində yalnız Marneulidə deyil,
bizim regionda
müxalifət çox zəifdir. Çünki əhali artıq mövcud
müxalif partiyaları dəstəkləmirlər.
Biz qərar qəbul etdik ki, yeni güc və komanda ilə
birlikdə Marneuli ofisi açaq. “Lelo”nun ofisi fəaliyyət göstərəcək
və əhali ilə birlikdə olacaq. Mən əminəm ki, bu regionda çox yaxşı
nəticə əldə edəcəyik, xalqla, Marneulilərlə, Kvemo Kartlidə yaşayan
adamlarla birlikdə çox işlər görəcəyik", – Aqil
Mustafayev bildirdi.
Qeyd edək ki, Aqil Mustafayev son iki il ərzində siyasətdə fəal
iştirak etmirdi. Ona qədər isə VMH-ın Marneuli rayon təşkilatının
rəhbəri idi.
"Bildiyiniz kimi, son iki il ərzində heç bir partiyaya üzv
deyildim. Mən müxtəlif partiyaların fəaliyyətini, proqramlarını
görürdüm. Uzun zaman düşündükdən sonra qərar qəbul etdim ki, “Lelo”
mənim bu hakimiyyətə qarşı daha çox mübarizə aparacağım partiyadır.
“Lelo” Avropa dəyərləri ilə yaradılıb və ona görə mənim üçün də
Avropa tərəfində olmaq əsas idi. Biz yeni gücümüz, yeni və təmiz
adamlarla daha çox iş görə bilərik", – Aqil
Mustafayev dedi.
Marneulidə "Lelo Gürcüstan Naminə" partiyasının ofisinin açılışında
partiya sədri Mamuka Xazaradze də iştirak edirdi. O, jurnalistlərlə
söhbəti zamanı Marneulinin Gürcüstanda gürcü bazarının inkişafı
istiqamətindəki əhəmiyyətindən söhbət açdı.
"Marneuli əməksevər insanları ilə seçilir. Burada
kifayət qədər çox kənd təsərrüfatı məhsulları yetişdirilir, ancaq
təəssüf ki, bizim ölkə istehlakçı oldu və özünün istehsal
etdiyindən daha çox idxal edilmiş məhsullardan istifadə edir. Ona
görə ilk növbədə məqsəd eynidir ki, hakimiyyət dəyişsin. Bizim
burada çox yaxşı, regionda öz məqsədini yaxşı yerinə yetirəcək
komandamız var. Biz istəyirik ki, bu region beynəlxalq standartlara
uyğun istehsalçı və ixraca istiqamətlənmiş region
olsun", – Mamuka Xazaradze bildirdi.
“Lelo”nun sədrinin sözlərinə görə, Marneulidə yerli sakinlərin
köməyi lazımdır ki, bələdiyyədə müəssisələr və emal sənayesi
yaradılsın və region əhalisi köçməsin.
"Ən əsası bu adamlar inteqrasiya olunmalıdır, gürcü
dili güclü tədris olunmalıdır ki, onlar ölkənin idarə edilməsində
iştirak etsinlər. Burada körpü tikilir, heç kim bilmir, bu
nepotizm, biganəliyin nəticəsidir. Region tərk edilib və
ümumiyyətlə Gürcüstanda insan tərk edilib. Biz bunu
düzəldəcəyik", – Mamuka Xazaradze bildirdi.
Mamuka Xazaradzenin sözlərinə görə, partiya Kvemo Kartli regionunda
fəal işləyəcək və bütün bələdiyyələrə gedəcək. Əhali ilə şəxsən
görüşəcək və Gürcüstan tarixində həlledici rol oynayacaq 2024-ci
ilin Parlament seçkilərinə hazırlaşacaqlar.