İki illik fasilədən sonra “Avropalı Gürcüstan”-ın Marneuli rayon
təşkilatının rəhbəri Əhməd İmamquliyev yenidən fəal siyasətə
qayıdıb.
“Marneuli” radiosuna danışan Əhməd İmamquliyev bildirir ki, 2021-ci
il yerli özünüidarə seçkilərindən sonra əhaliyə öz seçdiyi
deputatlarla işləmək imkanı yaratmaq üçün iki il siyasətlə məşğul
olmamaq qərarına gəlib.
“2021-ci il yerli özünüidarə seçkilərindən sonra
sakinlərimizə seçdikləri Bələdiyyə Məclisi üzvləri və bələdiyyə
sədri ilə üz-üzə qalmasına icazə verdim, çünki onlar bizə səs
vermədilər və onlara davam edən işlərə baxmaq imkanı verdim. Öz
seçdikləri insanlarla və partiyalarla baş-başa qalsınlar ki,
gələcəkdə, bu il hansı partiyaya səs verməli olduqlarına dair qərar
qəbul etsinlər. 2021-ci ildən indiyə kimi Marneuli bələdiyyəsində
müxalifət partiyasının nümayəndəsi və ya iqtidar partiyasının
təmsilçilərindən nə yaxşı, nə də pis heç nə eşitməmişik. İnsanlara
iki il vaxt verdim ki, bu və ya digər şəxsə səs verməyə dəyərmi,
fikirləşsinlər və 2024-cü il 1 yanvar tarixindən biz aktiv fazada
siyasi proseslərdə iştirak etməyə başladıq”, - Əhməd
İmamquliyev bildirib.
“Avropalı Gürcüstan”-ın Marneuli rayon təşkilatının rəhbərinin
sözlərinə görə, son iki ildə onlar siyasətlə məşğul olublar, əhali
ilə söhbət ediblər, amma fəal görünmürdülər. O, bildirir ki,
gələcək planları əhali ilə birlikdə müzakirə edib, işləyib, 2024-cü
il seçkilərinə maraqlı proqramlar və görüşlərlə hazırlaşıb.